एकदिवसीय विश्वकपमा दक्षिण अफ्रिकाद्वारा न्युजिल्यान्ड पराजित

१६ कार्तिक, काठमाडौं । एकदिवसीय विश्वकपमा दक्षिण अफ्रिकाले न्युजिल्यान्डलाई २४ वर्षपछि पराजित गरेको छ। १९९९ को विश्वकपपछि एकदिवसीय विश्वकपमा दक्षिण अफ्रिकाले न्युजिल्यान्डलाई पहिलो पटक हराएको हो।
बुधबार भएको खेलमा दक्षिण अफ्रिकाले साविक उपविजेता न्युजिल्यान्डलाई १ सय ९० रनको फराकिलो अन्तरले पराजित गरेको हो। विश्वकपमा न्युजिल्यान्डको यो दोस्रो फराकिलो अन्तरको हार हो। यसअघि २००७ मा अस्ट्रेलियासँग २ सय १५ रनले पराजित भएको थियो।
टस हारेर पहिले ब्याटिङ गरेको दक्षिण अफ्रिकाले न्युजिल्यान्ड समक्ष जितका लागि ३ सय ५८ रनको लक्ष्य प्रस्तुत गरेको थियो। जवाफमा न्युजिल्यान्ड  ३५.३ ओभरमा अलआउट हुँदै १ सय ६७ रनमा समेटिएपछि न्युजिल्यान्डले फराकिलो जित हासिल गरेको हो।
किवी टिमलाई हराएसँगै दक्षिण अफ्रिकाले सातौं खेलमा छैटौं जित निकाल्दै सेमिफाइनल लगभग पक्का गरेको छ। जारी विश्वकपमा भारत अपराजित रहँदा दक्षिण अफ्रिका नेदरल्यान्ड्ससँग मात्र हारेको छ। दक्षिण अफ्रिकाले प्रतियोगितामा पाकिस्तान, बंगलादेश, इंग्ल्यान्ड, अस्ट्रेलिया र श्रीलंकालाई हराएको छ।
महाराष्ट्र क्रिकेट एसोसिएसन (एमसीए)  स्टेडियममा भएको खेलमा दक्षिण अफ्रिकाले उच्च स्कोरमा दुई खेलाडीले शतक बनाउँदा एक खेलाडीले अर्धशतकीय इनिङ खेले। दक्षिण अफ्रिकाले निर्धारित ५० ओभरमा ४ विकेट गुमाएर २ सय ५७ रन बनायो।
उसका लागि ओपनर क्विन्टन डिककले जारी विश्वकपमा चौंथो शतक प्रहार गरे। उनी १ सय १४ रनमा आउट हुँदा रसि भान डेर डुसानले १ सय ३३ रन बनाए। उनीहरुले दोस्रो विकेटका लागि २ सय रनको साझेदारी गरेका थिए।
दक्षिण अफ्रिकाले लगातार ८ औं खेलमा पहिले ब्याटिङ गर्दै ३ सय ५० प्लसको स्कोर बनाएको हो। ओपनर तथा कप्तान टेम्बा बभुमा २४ रनमा आउट भएपनि दक्षिण अफ्रिकाका लागि डिकक र डुसानले सानदार इनिङ खेले।
त्यस्तै डेभिड मिलरले ३० बलमा ५३ रनको अर्धशतकीय इनिङ खेल्दा हेनरिच क्लासेनले ७ बलमा १५ रन तथा एइडेन माक्रमले १ बलमा छक्का प्रहार गर्दै इनिङको अन्त गरे। न्युजिल्यान्डका लागि ट्रेन्ट बोल्टले १ रन बनाउँदा टिम साउदीले २ विकेट लिएका थिए। त्यस्तै जेम्स निसमले १ विकेट लिए।
जवाफमा न्युजिल्यान्डका लागि ग्लेन फिलिप्सले ६० रन बनाउनु सर्वाधिक रह्यो। उनी बाहेक विल योङले ३३ तथा ड्यारीयल मिचेलले २४ रन बनाउनु थप दोहोरो रनको स्कोरका रुपमा रह्यो।
न्युजिल्यान्डलाई सस्तैमा समेट्ने क्रममा दक्षिण अफ्रिकाका केशब महराजाले ४ विकेट लिंदा मार्को जनसेनले ३ तथा कागिसो रबडाले १ विकेट लिंदा जेराल्ड कोट्जेको नाममा २ विकेट रह्यो ।