कार्तिक २० बाट हेटौंडा–९ मा सांस्कृतिक कार्यक्रम 

१७ कार्तिक, हेटौंडा । स्वतन्त्र युवा समाज हेटौंडा ९ को आयोजनामा यही कात्तिक २० गतेबाट हेटौंडा सांस्कृतिक मनोरञ्जन कार्यक्रम हुने भएको छ । हनुमानगेटमा रहेको औद्योगिक क्षेत्रको फुटबल चौरमा हुने सांस्कृतिक कार्यक्रम २८ गतेसम्म सञ्चालन हुने पत्रकार सम्मेलन गरि जानकारी गराइएको हो ।
चाडपर्वको समयमा राष्ट्रिय कलाकारहरुको सांगीतिक प्रस्तुतीसहित मनोरञ्जन प्रदान गर्ने उद्देश्यले कार्यक्रमको आयोजना गर्न लागेको व्यवस्थापक अजित राईले जानकारी दिए । सांस्कृतिक कार्यक्रममा प्रत्येक दिन फरक फरक राष्ट्रिय कलाकारको प्रस्तुती रहनेछ । 
तृष्णा गुरुङको ब्याण्ड, जिबब, धिरज राई, ज्योति मगर, पनाम ब्यान्ड, प्रिती आलेको सांगीतिक प्रस्तुतीसँगै रमेश प्रसाइँ र कल्पना दाहालको दोहोरी ब्याटल समेत रहनेछ । एक्सिस ब्यान्डसँग समेत कुरा भैरहेको राईले जानकारी दिए । 
‘विशुद्ध मनोरञ्जनका लागि हामीले कार्यक्रमको आयोजना गर्न लागेका हौं । प्रत्येक दिन फरक फरक कलाकारको विशेष प्रस्तुती रहनेछ’, राईले भने, ‘हामीले ल्याउन लागेको प्रायः कलाकारले हेटौंडामा पहिलो पटक प्रस्तुती दिन लागेका छन् ।’ 
कार्यक्रम स्थलमा खानाको स्टलसँगै बाल उद्दान पनि रहने कार्यक्रम संयोजक किरण लामाले जानकारी दिए । कार्यक्रमका लागि करिब २४ लाख रुपैयाँ खर्च हुने र ३० लाख रुपैयाँ आम्दानी गर्ने लक्ष्य रहेको बताइएको छ । 
चौरमा करिब ८ हजार दर्शक अट्ने स्वतन्त्र युवा समाजका अध्यक्ष सुशील मल्ले बताए । उनका अनुसार कार्यक्रममा १० वर्ष भन्दा मुनिका बालबालिका र ज्येष्ठ नागरिकलाई निशुल्क प्रवेशको व्यवस्था रहनेछ । 
कार्यक्रमको विषयमा जानकारी दिन आयोजित पत्रकार सम्मेलनमा जिल्ला समन्वय समिति मकवानपुरका सदस्य बीरेन्द्र लामा लगायतको उपस्थिती थियो ।