एकल संक्रमणीय व्यवस्था सहितको अध्यादेश पारित

१४ पुस, हेटौँडा । दुई साता देखी  विवादमा रहेको राष्ट्रिय सभा सम्बन्धी अध्यादेश अन्तत एकल संक्रमणीय व्यवस्थालाई स्वीकार गर्दै प्रमाणीकरण भएको छ । दबाबकाबीच राष्ट्रपति विद्यादेवी भण्डारीले शुक्रबार एकल संक्रमणीय व्यवस्था सहितको अध्यादेश पारित गरेकी हुन । 
    
राष्ट्रिय सभा अध्यादेशमा एकल संक्रमणीय व्यवस्था अंगिकार गरेसँगै राष्ट्रिय सभा प्रतिपक्षबिहीन बन्ने अवस्थालाई एकल संक्रमणीय व्यवस्थाले रोकेको छ । अध्यादेश पारित भएसंगै अब संसद्मा नेपाली काँग्रेस र अरु दलको बढीमा १६ सिट आउँने भएको छ । यसले कूल ५९ सदस्यीय राष्ट्रिय सभामा काँग्रेस बलियो प्रतिपक्ष नसकेपनि एउटा जिम्मेवार प्रतिपक्ष बन्न सक्ने भएको छ । 

यसले गर्दा लोकतन्त्रले हार्ने अवस्था आएको छैन । सरकारले पठाएको अध्यादेश पारित भएसँगै अब मुलुकमा एकल संक्रमणीय मतप्रणालीको आधारमा राष्ट्रिय सभा गठन हुने भएको छ । यसमा नेकपा एमाले भने स्पष्ट रुपमा आफ्नो अडानबाट हारेको छ । एकल संक्रमणीय निर्वाचन प्रणालीबाट राष्ट्रिय सभा गठन गर्नुपर्ने अडान राखेर कांग्रेसले नयाँ सरकार गठन प्रक्रिया अड्काउन खोजेको निष्कर्षसहित एमाले अध्यादेश पारितका लागि लचकता देखाउन तयार भएसँगै राष्ट्रपतिले अध्यादेश पारित गरेकी छिन  ।