मकवानपुरगढी र त्रिखण्डीमा एकादशी मेला सम्पन्न

७ मङ्सिर, हेटौंडा । मकवानपुरमा हरिबोधिनी एकादशीको अवसरमा ठुलो मेला लागेको छ । मकवानपुरको मकवानपुरगढी २ मा रहेको ऐतिहासिक गढीदरबार परिसर र भीमफेदी १ त्रिखण्डेश्वर मन्दिर परिसरमा मेला लागेको हो । एकादशी मेलामा बिहीबार बिहानै देखी भक्तजनहरु र मेला हेर्न आउनेको घुईचो लागेको हो । मकवानपुरगढी दरवार परिसरमा रहेको वंशगोपाल मन्दिरमा व्रतालुहरुले पुजाआजा गर्नुका साथै मेलामा नाचगान गरेर मनाएका छन् । मेला भर्न आउने भक्तालुहरुको लागि आवश्यक सुरक्षा र व्यवस्थापन गरिएको  वडा नम्बर २ का वडा अध्यक्ष बखानसिं पाख्रिनले बताए । मेलालाई व्यवस्थित गर्न प्रहरी, वडा कार्यालय, टोल विकास समितिले आवश्यक समन्वय गरेको अध्यक्ष पाख्रीनले बताए । त्यस्तै, भीमफेदी गाउँपालिका वडा नम्बर १ मा रहेको त्रिखण्डेश्वर महादेवको मन्दिर परिसरमा पनि ठुलो मेला लागेको छ । त्रिभूवन राजपथमा अवस्थित उक्त मन्दिर मेलाले गर्दा सडकमा सवारी साधान आवातजावतमा कठिनाई भएको थियो । सुरक्षाकर्मी परिचालन गरी मेलालाई सुरक्षित र व्यवस्थित गरिएको मकवानपुर प्रहरीले जनाएको छ । त्रिखण्डीमा पनि बिहीबार विहानै देखी श्रद्धालुको भीड लागेको थियो ।