एसियाली बुद्धिचालः भारतीय र बंगलादेशी खेलाडी उपाधि नजिक

१७ मङ्सिर, हेटौँडा । नेपाल बुद्धिचाल महासंघको तत्वावधान र मकवानपुर बुद्धिचाल संघको आयोजनामा हेटौँडामा जारी ‘हेटौँडा कप एसियाली खुला बुद्धिचाल प्रतियोगिता–२०८०’ अन्तर्गत शनिवार साँझसम्म सातौ राउन्डका खेलहरु सकिएका छन् । 
सातौ चरणका खेलहरु सकिदा २३९३ रेटेड भारतीय खेलाडी सुभयान र २२१७ रेटेड बंगलादेशी आईएम महम्मद मिनहाज उद्दिन ६ अंकका साथ अग्रस्थान बनाउँन सफल भएको मकवानपुरका बुद्धिचाल संघका अध्यक्ष मनोज श्रेष्ठले जानकारी दिए । 
भारतीय खेलाडी सुभयानले सातौ चरणसम्मको खेलमा पाँच जित र दुई बराबर गर्दै अग्रस्थानमा उभिएका छन् । उनले शनिवारको खेलमा भारत कै राहुल गुरुङ विरुद्ध जित निकाल्दै अंक बटुले । यता बंगलादेशी मिनहाज उद्दिनले भारतीय १९७६ रेटेड खेलाडी एएफएम सौरव चौबे माथि कठिन जीत निकाल्दै सुभयानसँग बराबरी गर्न सफल भए । 
यस्तै प्रतियोगितामा बंगलादेशी एफएम नयम हक, भारतका अमरदीप बर्तके, अर्बिन्दर प्रित सिं, बंगलादेशी आईएम सकिल अबु सफिन, एफएम सरिफ होसेन र एफएम शेख नासिर ५.५ अंक जोड्दै सामूहिक दोश्रो स्थानको होडमा छन् । 
प्रतियोगितामा नेपाली खेलाडीहरु एरिना आईएम शुश्रुत दहाल, युवा खेलाडी द्वय पुरुषोत्तम सिलवाल र कुशल बेलवासे ४.५ अंक बनाएर खेली रहेका छन् भने नेपाल कै पूर्व च्याम्पियन एफएम पुरुषोत्तम चौलागाईं, झापाका राजन सुवेदी, वर्तमान नेपाल च्याम्पियन एफएम रुपेश जैसवाल, युवा स्वर्णिम दुवाल र मुहान श्रेष्ठ पनि समान ४ अंकको साथमा प्रतिस्पर्धामा छन् । 
यसैगरी महिला तर्फ भारतीय महिला खेलाडी मरियम फातिमा ४.५ अंकका साथ पहिलो र श्रीलंकन महिला खेलाडी सचिनि रानासिंघे ४ अंक बनाई दोश्रो स्थानमा रहन सफल भएका छन् । नेपालका भेट्रान खेलाडी मोहन सिं प्रधानले ३ अंक जोड्दै आफूलाई प्रतिस्पर्धामा उभ्याउन सफल भएका छन् । 
स्विस नियमअनुसार नौ राउन्डमा जारी प्रतियोगिता आइतबार सम्पन्न हुने मकवानपुर अध्यक्ष श्रेष्ठले जानकारी दिए । प्रतियोगिताको विजेताले एक लाख २५ हजार रुपैयाँ प्राप्त गर्दा दोस्रो स्थानमा रहने खेलाडीले ७५ हजार र तेस्रो स्थानका खेलाडीले ४० हजार रुपैयाँ हात पार्नेछन् यसैगरी प्रतियोगितामा चौथो हुनेले २५ हजार रुपैयाँ र पाँचौँ हुने खेलाडीले २० हजार रुपैयाँ जित्नेछन । 
यस्तै प्रतियोगितामा टप १५ खेलाडी सहित सर्वोकृष्ट महिला, सर्वोकृष्ट भेट्रान्स, सर्वोकृष्ट जुनियर, सर्वोकृष्ट स्थानीयलगायत विभिन्न विद्यामा ३८ जनाले नगद पुरस्कार प्राप्त गर्ने अध्यक्ष श्रेष्ठले जानकारी दिए ।