४.३३ प्रतिशतलाई मात्रै जलवायु परिवर्तनबारे जानकारी

Google Photo

२० पुस, हेटौँडा । नेपालमा करिब ४ दशमलब ३३ प्रतिशत घरपरिवारले मात्र जलवायु परिवर्तनको बारेमा जानकारी पाएको एक तथ्याङ्कले देखाएको छ । 
जिल्ला समन्वय समिति मकवानपुरमा भएको कार्यक्रममा राष्ट्रिय योजना आयोग सचिवालयले राष्ट्रिय जलवायु परिवर्तन प्रभाव सर्वेक्षणमा तथ्यांकीय प्रतिवेदन सार्वजनिकीकरण गर्दै यस्तो जानकारी गराएको हो । धेरैजसो उत्तरदाताहरुले वनविनास, प्राकृतिक प्रकोप तथा मानव हस्तक्षेपलाई जलवायु परिवर्तनका मुख्य कारण भन्ने बुझेको पाईएको प्रतिवेदनमा उल्लेख गरिएको छ । नेपालमा पहिलो पटक राष्ट्रिय तथा अन्तराष्ट्रिय विज्ञहरुको सहयोगमा सर्वेक्षण सम्पन्न भएको समेत कार्यक्रममा जानकारी गराईएको थियो ।

आयोगले जलवायु परिवर्तनले आर्थिक, समाजिक तथा वातावरणीय क्षेत्रमा पारेको असरको तथा प्रभावको बारेमा जानकारी लिनको लागी यस्ता कार्यक्रम गर्दै आएको बताएको छ ।  जलवायु परिवर्तनको कारण विश्व जगत तथा वातावरणका विभीन्न पक्षहरुमा प्रत्यक्ष प्रभावहरु बढि रहेको र नेपालमा यसले कृषि क्षेत्र, वन, पानी र उर्जा लगायत विभीन्न क्षेत्रहरुमा पारिरहेको असरबारे सर्वसाधारणलाई सचेत गराउन पनि यो कार्यक्रम आवश्यक रहेको आयोगका निर्देशक ढुंडिराज लामिछानेले जानकारी दिए ।