गाउँपालिका स्तरीय भलिबल प्रतियोगितामा नमूना गितावर युवा क्लब, पावस बिजयी 

२२ पुस, हेटौँडा । मकवानपुरको पूर्वी क्षेत्र बकैया गाउँपालिकामा गाउँपालिका स्तरीय नकआउट भलिबल प्रतियोगिता सम्पन्न भएको छ । बकैया गाउँपालिका वडा नम्बर ७ स्थित घमनटोल स्पोर्टस क्लबको आयोजनामा भएको गाउँपालिका स्तरिय नकआउट भलिवल प्रतियोगितामा नमूना गितावर युवा क्लब पावस बिजयी भएको छ । 
शनीबार भएको प्रतियोगिताको फाईनल खेलमा पावसले लालिगुँरास युवा क्लब गोठखोलालाई २५–१७, २५–२३ र २५–२३ को सोझो सेटमा पराजित गर्दै उपाधि जितेको हो । प्रतियोगिताको बिजेता तथा उपबिजेताले नगद दशहजार र पाँचहजार सहित मेडल तथा प्रमाणपत्र प्राप्त गरेको आयोजक क्लबका अध्यक्ष राजकुमार तिमल्सिनाले जानकारी दिए । 
पुष १९ गतेबाट सुरु भएको नक आउट भलिबल प्रतियोगितामा बकैया गाउँपालिका भित्रका ७ वटा टिम सहभागीता रहेको थियो । 
क्लबको अध्यक्ष तिमल्सिनाको अध्यक्षता तथा बकैया गाउँपालिका ७ नम्बर वडाका वडा अध्यक्ष रामकाजी लामिछानेको प्रमुख आतिथ्यतामा भएको समापन कार्यक्रममा हात्तिचरण सामूदायिक बन उपभोक्ता समूहका अध्यक्ष पवन सिँह गुरुङ, राष्ट्रिय रेफ्रि दिपक कर्माचार्य लगाएतको उपस्थिति थियो ।
प्रतियोगिताको बिजयी टिम पावसले पेट सम्बन्धी रोगका बिरामी तथा खेलप्रेमी जयबहादुर माझीको उपचार खर्च स्वरुप उक्त पुरस्कार सहयोग गरेको क्लबका अध्यक्ष तिमल्सिनाले जानकारी दिए ।