रानीको २४ औं बार्षिकोत्सव मनाईयो

२२ पुस, हेटौँडा । हेटौडा–६, चौघडामा रहेको रानी सामुदायिक वन उपभोक्ता समूहको २४ औं वार्षिक उत्सव शनिवार सम्पन्न भएको छ ।

समूहले वार्षिक उत्सवको अवसरमा विभिन्न विधामा उत्कृष्ट उपभोक्ताहरुलाई सम्मान गरेको छ । समूहले फलफूल खेतीमा हेटौडा–६ दिव्यनगरका शारदा अधिकारी, पशुपालनमा मकवानपुरगढी–३ का तारानाथ सापकोटा, हस्तकलामा हेटौडा–६ खडकुलेका रामकृष्ण राई, खेतीमा हेटौडा–६ पुतलीबजारका मोहनबहादुर भण्डारी र महिला उपसमूहमा सुनौलो आयआर्जन महिला समूहलाई सम्मान गरिएको थियो ।

यसैगरी उपभोक्ताहरुमा हेटोडा–६, पुतलीबजारका रामहरी ओझा, हेटौडा–६, दिव्यनगरका रामचन्द्र सापकोटा र मकवानपुरगढी–३, मक्रान्चुलीका कृष्णप्रसाद हुमागाईलाई सम्मान गरिएको थियो । जिल्ला वन अधिकृत राजेन्द्र न्यौपानेको प्रमुख आतिथ्यता एवम कार्यक्रम संयोजक डोरबहादुर अधिकारीको अध्यक्षतामा कार्यक्रम भएको हो ।

कार्यक्रममा सामुदायिक वन उपभोक्ता महासंघ,मकवानपुरकी अध्यक्ष पञ्चमाया स्याङतान, हेटौडा ईलाका वन कार्यालयकी सहायक वन अधिकृत राधिका शर्मा,वन समूहका अध्यक्ष कृष्णबहादुर विडारी, सुनौलो आयआर्जन महिला समूहकी अध्यक्ष पवित्रा रुम्वा, समूहका सल्लाहकार साधुराम चौलागाई, जनकल्याण सहकारीका उपाध्यक्ष श्यामप्रसाद भट्टराई, चुच्चेखोला सामुदायिक वनका कार्यालय सचिव केदार गौतम, समूहकी सचिव नानीमैया रुम्वा, कार्यालय सचिव भीमसेन पौडेल लगायतकाले मन्तव्य व्यक्त गरेका थिए ।