नेपाली यु-१९ टिमद्वारा अभ्यास खेलमा नामिबिया पराजित

२७ पुस, हेटौंडा । आइसिसी यु-१९ विश्वकपका लागि दक्षिण अफ्रिका पुगेको नेपाली युवा टिमले अभ्यास खेलमा नामिबियामाथि रोमाञ्चक जित निकालेको छ । बिहीबार राति सम्पन्न खेलमा नेपालले नामिबियालाई ६ रनले हराउँदै लगातार दोस्रो अभ्यास खेलमा जित हासिल गरेको हो ।
नेपालले पहिले ब्याटिङ गर्दै जितको लागि दिएको १ सय ४२ रनको सामान्य लक्ष्य पछ्याएको नामिबिया २९.५ ओभरमा १ सय ३५ रनमा अल आउट भएपछि नेपाल विजयी भयो। नामिबियाका लागि कप्तान बसिंग भोल्स्चेन्कले ४९ बलमा ५० रनको अर्धशतकीय इनिङ खेलेका थिए भने मोफिटले १८ रन बनाए। नेपालका गुलशन झा र आकाश चन्दले समान ३-३ विकेट लिए ।
त्यसअघि टस हारेर पहिला ब्याटिङ गरेको नेपालले निर्धारित ३० ओभरमा ९ विकेट गुमाउँदै १ सय ४१ रन बनाएको थियो। बर्षाको कारण ढिलो शुरु हुँदा खेल ३० ओभरमा झारिएको थियो। नेपालका लागि १० औं नम्बरमा ब्याटिङका लागि आएका दिपक डुम्रे २२ बलमा ३ चौका र १ छक्कासहित सर्वाधिक ३२ रनमा नट आउट रहे। त्यस्तै उत्तम थापा मगर १२ रन बनाउँदा आकाश त्रिपाठीले २१ तथा विशाल बिक्रम केसीले १४ र दिपक बोहराले १५ रन बनाए। नामिबियाका जे करिआटा, जेन्स रेन्सबर्ग र बडेन्हओरस्टले समान दुई विकेट लिए।
जनवरी १९ देखि फेब्रुअरी ११ सम्म हुने विश्वकपमा नेपाल समूह ‘डी’ मा रहेको छ जहाँ न्यूजिल्याण्ड, पाकिस्तान र अफगानिस्तान रहेका छन् ।