नवनिर्वाचित जनप्रतिनिधिलाई सम्मान

२४ पुस, हेटौँडा । हेटौडा–१७ गैरीगाउँमा रहेको श्रीमदभागवत ज्ञानसंचार वृद्धाश्रमले मकवानपुरबाट निर्वाचित प्रतिनिधि तथा प्रदेश सभाका सांसदहरुलाई आज एक कार्यक्रमको आयोजना गरि सम्मान गरेको छ । 
कार्यक्रममा मकवानपुर जिल्ला निर्वाचन क्षेत्र नम्बर १ का सांसद कृष्णप्रसाद दाहाल, २ का सांसद विरोध खतिवडा, प्रदेश सभा सांसद प्रेमबहादुर पुलामी, डोरमणी पौडेल, ईन्द्रबहादुर बानियाँ, कुमारी मोक्तानलाई सम्मान गरिएको थियो । यसैगरी नेकपा एमालेका प्रदेश सभामा समानुपातिकमा सिफारिस मुनु सिग्देल र जुनेलीकुमारी श्रेष्ठलाई पनि सम्मान गरिएको थियो ।  
कार्यक्रममा मकवानपुर क्षेत्र नं. १ का सांसद कृष्णप्रसाद दाहालले बामगठबन्धनको सरकार बनेपछि देश आर्थिक समृद्धिको दिशा तर्फ बढ्ने र बृद्धबृद्धाहरुको बृहत्तर हितमा काम गर्ने बताए । मकवानपुर क्षेत्र नं. २ का सांसद एवम नेकपा एमालेका केन्द्रीय सदस्य विरोध खतिवडाको प्रमुख आतिथ्यता एवम वृद्धाश्रमका अध्यक्ष हरीप्रसाद सिग्देलको अध्यक्षतामा कार्यक्रम भएको थियो । कार्यक्रममा वृद्धाश्रमका उपाध्यक्ष देवकृष्ण घिमिरे, सचिव कुमारमणी दहाल, नवराज न्यौपाने लगायतकाले मन्तव्य व्यक्त गरेका थिए ।