हेटौंडाबाट पेस्तोल र लागूऔषध सहित ४ जना पक्राउ

५ माघ, हेटौंडा । मकवानपुर प्रहरीले शुक्रबार छुट्टाछुट्टै घटनामा एक थान पेस्तोल, उक्त पेस्तोलमा लाग्ने एक थान गोली र विभिन्न परिणामको लागूऔषध सहित ४ जनालाई पक्राउ गरेको छ ।
प्रहरीले पूर्वपश्चिम राजमार्ग अन्तर्गत हेटौँडा उपमहानगरपालिका वडा नम्बर १५ रातोमाटे चेकपोष्टबाट बाजुरा जिल्लाको हिमाली नगरपालिका वडा नम्बर १ का ३१ वर्षीय देवबहादुर थापा र नवलपरासी पुर्वी सुस्ताको कावासोती नगरपालिका ५ बस्ने ५७ वर्षका वीरबहादुर थापा मगरलाई पक्राउ गरेको हो ।
मकवानपुरका प्रहरी प्रवक्ता लक्ष्मी भण्डारीका अनुसार प्रहरीले उनीहरुलाई हेटौँडाबाट काकडभिट्टातर्फ जाँदै गरेको मे १ ख २५३७ नम्बरको बस जाँच गर्ने क्रममा बसको ३ र ४ नम्बरको सिटबाट उनीहरुलाई पक्राउ गरेको हो । 
प्रवक्ता लक्ष्मी भण्डारीले उनीहरु बसेको सिटमुनी राखेको झोलाबाट एकथान पेस्तोल, एक थान गोली र दुईवटा प्लास्टिकको झोलामा सेतो रंगको पाउडर जस्तो देखिने धुलो पदार्थ अन्दाजी २ किलो ७०० ग्राम वरामद गरिएको जानकारी दिए ।
यस्तै प्रहरीले शुक्रबार नै विभिन्न परिमाणको अवैध लागूऔषध सहित दुईजनालाई पक्राउ गरेको छ । पूर्वपश्चिम राजमार्ग अन्तर्गत हेटौंडा १५ रातोमाटेमा वीरगञ्जबाट हेटौंडातर्फ आउँदै गरेको बा प्र ०१–००१ ख ५८६८ नम्बरको ईलेक्ट्रोनिक गाडीबाट लागूऔषधसहित दुईजनालाई पक्राउ गरेको हो ।
प्रहरीले तनहुँको व्यास नगरपालिका ६ का ३२ वर्षीय बमबहादुर बि.कले दुवै खुट्टाको घुँडा मुनि र तिघ्रामा टेपले बेरेर ल्याएको अवस्थामा डाईजेपाम २५ एम्पुल, फेनारगन २५ एम्पुल र नुफिन २५ एम्पुल फेला  पारेको हो । 
यसैगरी सोही गाडीमा आएका नवलपरासीको देवचुली नगरपालिका ७ का ३० वर्षीय अर्जुन विकलाई पनि प्रहरीले पक्रेको छ । उनले कम्मरको भागमा लुकाएर ल्याएको अवस्थाको लागूऔषध डाईजेपा ६ एम्पुल, फेनारगन ६ एम्पुल, नुफिन ६ एम्पुल फेला पारिएको जिल्ला प्रहरी कार्यालय मकवानपुरले जनाएको छ । 
पेस्तोल र लागूऔषधसहित पक्राउ परेका चारैजनालाई थप अनुसन्धान एवं कारबाही प्रक्रिया अघि बढाइएको प्रवक्ता भण्डारीले जानकारी दिए ।