छैठौं स्थानीय तह शहिद स्मृति मकवानपुर गोल्डकप माघ १६ देखि

६ माघ, हेटौंडा । मकवानपुर जिल्ला फुटबल संघको आयोजनामा हुने स्थानीय तह सहीद स्मृति मकवानपुर गोल्डकपको छैठौं संस्करण यहि माघ १६ देखि २७ गतेसम्म हुने भएको छ । 
आयोजकले प्रतियोगिताको तयारीको बारेमा शुक्रबार जानकारी दिँदै यसबर्ष प्रतियोगितामा १२ टिमको सहभागीता रहने जनाएको छ । आयोजक फुटबल संघ मकवानपुर अध्यक्ष एवं एन्फा केन्द्रीय सदस्य टीकाराम लामाले प्रतियोगिता हेटौँडा उपमहानगरपालिका वडा नम्बर ६ मा रहेको गौरिटार रंगशालामा हुने जानकारी दिए । 
अध्यक्ष लामाले यस वर्षको गोल्डकपमा पारो एफसी भुटान, ए डिभिजन क्लवहरु चर्चब्वाइज युनाइटेड, संकटा क्लवको सहभागीता रहने जानकारी दिए ।
यस्तै प्रतियोगितामा हिमालयन शेर्पा क्लव, त्रिभुवन आर्मी, नेपाल पुलिस क्लव, मच्छिन्द्र क्लव, मनाङ मस्र्याङ्दी क्लव, थ्रीस्टार क्लव, बागमती युवा क्लव सर्लाही, राजारानी क्लव धनकुटा र एन्फा मकवानपुरको सहभागिता रहने अध्यक्ष लामाले बताए ।
मकवानपुरको डाँफे युवा क्लवले व्यवस्थापकीय जिम्मेवारी लएको प्रतियोगिताको विजेताले १५ लाख र उपविजेताले १० लाख रुपैयाँसहित ट्रफी र मेडल प्राप्त गर्नेछन् ।
यस्तै प्रतियोगितामा विधागत उत्कृष्ट खेलाडीले जनही नगद २५ हजार रुपैयाँसहित ट्रफी प्राप्त गर्नेछन् भने हरेक खेलको म्यान अफ द म्याचलाई नगद १० हजार रुपैयाँसहित ट्रफी प्रदान गरिने आयोजकले जनाएको छ ।
यसैगरी हरेक बर्ष झै यसबर्ष पनि प्रतियोगिताको सर्वोत्कृष्ट खेलाडीलेलाई बुलेट मोटरसाइकल प्रदान गरिने अध्यक्ष लामाले जानकार दिए । प्रतियोगिता सञ्चालनको लागि एक करोड ६० लाख ५० हजार रुपैयाँ खर्च लाग्ने आयोजकको अनुमान गरेको छ । प्रतियोगितामा मकवानपुर जिल्लाका १० स्थानीय तहहरुले आर्थिक सहयाग गर्ने पनि अध्यक्ष लामाले बताए ।