ज्योति माविको नयाँ भवनको शिलान्यास

११ माघ, हेटौँडा । हेटौंडा उपमहानगरपालिका–१८ मा रहेको ज्योति माध्यमिक विद्यालय (प्राविधिक शिक्षालय)को ४ कोठे भवनको शिलान्यास गरिएको छ । हेटौंडा उपमहानगरपालिकाको सहयोगमा निर्माण हुने भवनको बुधवार उपमहानगरका मेयर मीनाकुमारी लामाले शिलान्यास गरेकी हुन् । 
चालु आर्थिक बर्षको बजेटमा समावेश रहेको विद्यालय भवन निर्माणका लागि करिब १ करोड रुपैयाँ लाग्ने विद्यालय व्यवस्थापन समितिका अध्यक्ष हर्क रम्तेलले जानकारी दिए । 
भवनको शिलान्यास गर्दै मेयर लामाले शैक्षिक गुणस्तर सुधारका लागि उपमहानगर लागिपरेको बताइन् । उनले शैक्षिक सुधारका लागि उपमहानगरले नयाँ कार्ययोजना बनाएर अघि बढ्ने तयारीमा रहेको जानकारी दिइन् । 
आगामी आर्थिक वर्षलाई शैक्षिक वर्षको रुपमा मनाउने तयारीमा उपमहानगर रहेको भन्दै विद्यार्थीलाई गुणस्तरीय शिक्षा दिने काममा अभिभावक र शिक्षकको भूमिका महत्वपूर्ण हुने उनको धारणा थियो । 
विद्यालय व्यवस्थापन समितिका अध्यक्ष रम्तेलको अध्यक्षतामा भएको कार्यक्रममा हेटौंडा १८ का वडा अध्यक्ष अनिलकुमार बानियाँ, विद्यालयका प्रधानाध्यापक जयराम थापा सहित स्थानीय संघसंस्थाका प्रतिनिधिहरुको आतिथ्यता रहेको थियो ।