मकवानपुर गोल्डकपः शेर्पालाई हराउँदै एनआरटी एनआरटी क्वार्टरफाइनलमा

१८ माघ, हेटौँडा । हिमालयन शेर्पालाई ३–० ले हराउँदै न्यूरोड टिम (एनआरटी) हेटौँडाको गौरिटार रंगशालामा जारी स्थानीय तह सहिद स्मृति मकवानपुर गोल्डकपको क्वार्टरफाइनलमा प्रवेश गरेको छ । 
बुधबार भएको खेलमा साविक उपविजेता समेत रहेको शेर्पालाई निराश बनाउँदै एनआरटीले क्वार्टरफाइनलमा स्थान बनाएको हो । सुरुवाती समय निकै राम्रो खेल प्रस्तुत गरेको शेर्पाले २९ औं मिनेटमा गोल व्यहोरेको थियो । जोन ग्लोरीले निकालिदिएको पासलाई सदुपयोग गर्दै सरोज तामाङले गोल गरेका हुन् । 
पहिलो हाफ एक गोलले अघि रहेको एनआरटीले दोस्रो हाफमा दुई गोल थपेको थियो । ५७ औं एनआरटीका रोहन खड्कीले अग्रता दोब्बर पारे । उनले शेर्पाका दुई डिफेण्डरलाई छक्याउँदै गरेको प्रहार गोलमा परिणत भएको थियो । 
८६ औं मिनेटमा एनआरटीले अर्को गोल थप्यो । मोहित गुरुङको क्रसलाई सुमित श्रेष्ठले गोलमा परिणत गरेका हुन् । सुरुवाती करिब आधा घण्टा शेर्पाले राम्रो खेल खेल्दै केही अवसर समेत सृजना गरेको थियो । २२ औं मिनेटमा शेर्पाका नेपोलियनले वान भर्सेस वान प्रहारलाई गोल गर्न सकेनन् । 
एनआरटीका खेलाडीले अफसाइड भनेर छोडेको अनसाइड नै रहेको बललाई उनले गोल गर्ने प्रयास गरेपनि गोलरक्षक प्रिसोले बचाएका थिए । त्यसको तीन मिनेट पछि नेपोलियनकै सशक्त प्रहारलाई प्रिसोले मुस्किलले बचाए । 
दोस्रो हाफमा भने एनआरटी हावी भएको थियो । खेलको म्यान अफ द म्याच एनआरटीका सरोज तामाङ घोषित भए । उनले नगद १० हजार रुपैयाँसहित ट्रफी प्राप्त गरे । हिमायन शेर्पा क्लवका प्रशिक्षक शिव लामाले तयारी नपुगेको र टिम सेटअप हुन नसकेकोले हार व्यहोर्नुपरेको प्रतिक्रिया दिए । 
यता एनआरटीका प्रशिक्षक जीवन सिन्केमानले आफ्ना खेलाडीले उत्कृष्ट खेल्दै राम्रो नतिजा निकालेको बताए । जारी प्रतियोगितामा बिहीबार मच्छिन्द्र फुटबल क्लव र सशस्त्र प्रहरीको एपिएफबीच खेल हुनेछ । १२ टोलीको सहभागिता रहेको प्रतियोगिता २७ गतेसम्म सञ्चालन हुनेछ । 
गोल्डकपको विजेताले नगद १५ लाख र उपविजेताले दशलाख रुपैयाँसहित ट्रफी प्राप्त गर्नेछ । सर्वोत्कृष्ट खेलाडीलाई बुलेट मोटरसाइकल र विधागत उत्कृष्ट खेलाडीले जनही नगद २५ हजार रुपैयाँसहित ट्रफी प्राप्त गर्ने आयोजक मकवानपुर जिल्ला फुटबल संघ मकवानपुर अध्यक्ष टीकाराम लामाले जानकारी दिए ।