हेटौँडामा बायोमेडिकल वर्कसपको स्थापना

१९ माघ, हेटौंडा । स्वास्थ्य आपूर्ति व्यवस्थापन केन्द्र मकवानपुरमा बिहीबार बायोमेडिकल वर्कसपको उद्घाटन गरिएको छ । बायोमेडिकलको प्रदेशका स्वास्थ्य मन्त्री उत्तम जोशीले उद्घाटन गरेका हुन् । 
वर्कशपको स्थापनासँगै प्रदेशका अस्पतालहरूमा बिग्रिएका स्वास्थ्य उपकरणहरुको मर्मत गर्न सहज हुने भएको छ । वर्कसपको स्थापनाले स्वास्थ्य उपकरणको अभाव पूर्ति र व्यवस्थापन गर्न सहज हुने मन्त्री जोशीको दावी छ । 
उनले स्वास्थ्य संस्थाहरुमा उपकरण बिग्रिदा बनाउने स्थानको अभाव र तत्काल नयाँ व्यवस्थापन गर्न नसक्दा सेवाग्राहीले उपचार गर्न नपाएको गुनासो हट्ने बताए । 
निक साइमन्स इन्स्टिच्युटको सहकार्यमा स्थापना गरिएको वर्कसपमा हाल एकजना बायोमेडिकल इन्जिनियर र एकजना इलेक्ट्रिकल टेक्निसियन राखेर कामको सुरुवात गरिएको स्वास्थ्य आपूर्ति तथा व्यवस्थापन केन्द्रका प्रमुख वसन्त अधिकारीले जानकारी दिए । 
स्वास्थ्य संस्थामा सञ्चालनमा आउन नसकेका उपकरणको मर्मतका लागि थप दुईजना बायोमेडिकल टेक्निसियन आवश्यक रहेको उनको भनाइ छ । स्वास्थ्य आपूर्ति तथा व्यवस्थापन केन्द्र बागमती प्रदेशको करिब एक करोड रुपैयाँ लागतमा प्रदेश बायोमेडिकल वर्कसप स्थापना गरिएको हो । 
सोही अवसरमा निक साइमन इन्स्टिच्युटले वर्कसप सञ्चालनका लागि आवश्यक ७१ लाख रुपैयाँबराबरको क्यालिब्रेसन टुल्स सहयोग हस्तान्तरण पनि गरेको छ ।