धनकुट्टाको राजारानीसँग पुलिस पराजित

२० माघ, हेटौंडा । नेपला पुलिस क्लबलाई २–० गोल अन्तरले हराउँदै धनकुट्टाको राजारानी फुटबल क्लब हेटौँडामा जारी छैटौं स्थानीय तह सहिद स्मृति मकवानपुर गोल्डकपको क्वार्टरफाइनलमा प्रवेश गरेको छ । 
पहिलो हाफ गोलरहित बराबरी भएकोमा दोस्रो हाफमा दुई गोल गर्दै राजारानीले पुलिसलाई निराश बनाएको हो । राजारानीको जितमा विदेशी खेलाडी अजायी मार्टिन्स र सशिल लामाले गोल गरेका हुन् ।
खेलको ५३ औं मिनेटमा मार्टिन्सले हेडमार्फत गोल गर्दै राजारानीलाई सुरुवाती अग्रता दिलाएका थिए । यस्तै खेलको ६४ मिनेटमा सुशिल लामाले गोल गरेपछि राजारानीको जित सुनिश्चित बन्यो । खेलको म्यान अफ द म्याच पहिलो गोलकर्ता मार्टिन्स घोषित भए । उनले नगद १० हजार रुपैयाँसहित ट्रफी प्राप्त गरे । 
पुलिस क्लवका प्रशिक्षक चेतन घिमिरेले नयाँ युवा खेलाडीलाई समेटेर टिम बनाउँदा सेटिङ मिल्न नसक्दा पराजय भोग्नु परेको दावी गरे । उनले नियमित खेलाडीहरु बाहिर रहँदा तालमेलको अभाव देखिएको बताए । 
यस्तै राजारानी क्लवका प्रशिक्षक सविन अधिकारीले नेपाल पुलिससँगको जितले आफुहरु निकै खुशी भएको प्रतिक्रिया दिए । आफुहरुको जित्ने लक्ष्य पुरा भएको बताउँदै उनले आगामी दिनमा थप सुधारिएको खेल प्रश्तुत हुने बताए ।
१२ टोलीको सहभागिता रहेको प्रतियोगिता २७ गतेसम्म सञ्चालन हुनेछ । प्रतियोगिताको विजेताले नगद १५ लाख र उपविजेताले दशलाख रुपैयाँसहित ट्रफी प्राप्त गर्नेछ । सर्वोत्कृष्ट खेलाडीलाई बुलेट मोटरसाइकल र विधागत उत्कृष्ट खेलाडीले जनही नगद २५ हजार रुपैयाँसहित ट्रफी प्राप्त गर्ने आयोजक मकवानपुर जिल्ला फुटबल संघले जनाएको छ । जारी प्रतियोगितामा शनिबार न्यूरोड टिम एनआरटी र चर्च ब्वाइज क्लवको बीचमा हुनेछ ।