मकवानपुर गोल्डकपः आर्मी पहिलो खेलमै पराजित

२३ माघ,  हेटौंडा । आहा रारा गोल्डकपको विजेता त्रिभुवन आर्मी फुटबल क्लव मकवानपुर गोल्डकपमा पहिलो खेलबाटै बाहिरिएको छ । धनकुटाको राजारानी फुटबल क्लवले आर्मीलाई सडनडेथमा स्तब्ध बनाएको हो ।
निर्धारित समय र टाइब्रेकरमा समेत बराबरी भएपछि खेल सडनडेथमा पुगेको थियो । सुरुवाती अग्रता जोगाउन नसक्दा आर्मी निराश हुँदै खेलबाट बाहिरिएको छ । खेलको १० औं मिनेटमै आर्मीले रासबहादुर मगरको गोलमार्फत अग्रता लिएको थियो । 
सुरुवातीमै पछि परेको राजारानी ८४ औं मिनेटमा खेलमा फर्किएको थियो । मिडबाट प्राप्त बललाई अजायी मार्टिन्सले हेडमार्फत पोष्टको दिशा दिएका हुन् । 
दुबैतर्फबाट एक÷एकको बराबरीमा रोकिएपछि टाइब्रेकरमा राजारानीका विशाल घलान, रुपेश केसी, दीप कार्की, प्रवेश द्नुवार र उमेश कार्कीको प्रहार गोल भएको थियो । सुनिल खड्काको प्रहारलाई आर्मीका गोलरक्षक समित श्रेष्ठले रोक्दा अशोक खवासको प्रहार आकाशिएको थियो ।
यस्तै आर्मीबाट जितेन्द्र कार्की, कमल थापा, राशबहादुर मगर र बिमल पान्डेको प्रहार गोल हुँदा वसन्त जिम्बा र श्रीराम चौधरीको प्रहार बाहिरिएको थियो । सिद्धान्त चौधरीको प्रहारलाई राजारानीका गोलरक्षक कार्कीले रोकेका थिए । 
खेलको म्यान अफ द म्याच गोलरक्षक कार्की घोषित भए । उनले नगद १० हजार सहित ट्रफी प्राप्त गरे । जारी प्रतियोगितामा मंगलबार अन्तिम क्वार्टरफाइनल अन्तर्गत थ्रीस्टार र एपिएफको खेल हुनेछ । 
२७ गतेसम्म सन्चालन हुने प्रतियोगिताको विजेताले १५ लाख र उपविजेताले १० लाख प्राप्त गर्नेछ ।