बानियाँद्वारा मनहरीमा कम्बल वितरण

२५ पुस, हेटौँडा । नेपाली काँग्रेस मकवानपुरका सभापति एवं मकवानपुरका प्रदेश सभा सदस्य ईन्द्रबहादुर बानियाँले आफ्ना स्वर्गीय पिता क्षेमबहादुर बानियाँको स्मृतिमा मनहरी–४ नयाँबस्तीमा कम्बल वितरण गरेका छन् । 
बाढीबाट विस्तापित भएर नयाँबस्तीको जंगलमा आश्रय लिएर बसिरहेका बनकरिया, प्रजा, तामाङ लगायतका ३ सय १५ परिवारलाई बानियाँले कम्बल वितरण गरेका हुन् ।
जाडोमा कठ्याङग्रिएर रात विताउन बाध्य मनहरी–४ स्थित अजिङ्गरे, चिसापानी, च्वारपाखा, लामपाखा, बनकरिया टोल र डोलबारी टोलका ३ सय १५ परिवारलाई कम्बल वितरण गरेका थिए । कार्यक्रममा बोल्दै पूर्व गृह राज्यमन्त्री बानियाँले आफूले पहिले बाढीबाट विस्थापित हुने वित्तिकै त्रिपाल, म्याटलगायत खाद्यबस्तु वितरण गरेको र अहिले जाडोमा थोरै भएपनि मद्दत पुगोस् भनेर कम्बल वितरण गरेको बताए । बानियाँले यहाँका विस्थापित परिवारलाई जतिसक्दो चाँडो गाउँपालिकासंग समन्वय गरेर स्थायी बसोबासको व्यवस्था मिलाउने प्रतिवद्धता व्यक्त गरे । 
कार्यक्रममा काँग्रेसका महासमिति सदस्य भरत पराजुली, नेपाल शिक्षक संघ मकवानपुरका सचिव विदुर थापा, काँग्रेसका स्थानीय नेताहरु पवन खड्का, साविक हाँडीखोलाका काँग्रेस सचिव हरिकृष्ण विष्ट, विष्णु विष्ट, उद्धव विष्टलगायतको उपस्थिति रहेको थियो ।