क्यानडाविरुद्धको एकदिवसीय क्रिकेटको दोस्रो खेलमा नेपाल विजयी

२७ माघ, काठमाडौं । क्यानडाविरुद्धको एकदिवसीय क्रिकेटको दोस्रो खेलमा पनि नेपाल विजयी भएको छ । त्रिवि क्रिकेट मैदानमा क्यानडाले दिएको २८६ रनको लक्ष्य नेपालले २९ बल बाँकी छँदै ६ विकेट गुमाएर भेट्टायो ।
नेपालको जितका लागि कप्तान रोहित पौडेलले ८७, देव खनालले ७६, अनिलकुमार साहले ५०,भीम सार्कीले २३ र पवन सर्राफले १४ रनको योगदान गरे । त्यस्तै आसिफ सेखले १०, कुशल मल्ल र सोमपाल कामीले ९/९ रन जोडे ।
क्यानडाविरुद्धको ३ एकदिवसीय सिरिजमा नेपालले दुई खेल जितिसकेको छ । अन्तिम एकदिवसीय सिरिज सोमबार हुनेछ ।
टस जितेर ब्याटिङ रोजेको क्यानडाले नेपाललाई २८६ रनको लक्ष्य दिएको थियोे । 
 क्यानडाका लागि ओपनर ब्याट्सम्यान एरोन जोन्सनले ६५ रन बनाए । अर्का ओपनर नवनित धालिवालले टोलीको खातामा ४६ रन थपेका थिए । तेस्रो नम्बरका ब्याट्सम्यान परगात सिंहले पनि ३८ रन बनाए । निकोलस किर्तन २० रनमा आउट भए । श्रेयष मोभाले पनि टोलीको खातामा ४० रन थपेका थिए । उनले ४२ बलमा चार चौका पनि प्रहार गरे । उदय भगवानले पनि अविजित २० रन बटुले । उनले १५ बलमा एक छक्का र एक चौका हिर्काएका थिए । 
नेपालका लागि कप्तान रोहित पौडेल र कुशल मल्लले समान २ तथा पवन सर्राफ, आकाश चन्द, सूर्य तामाङ र सोमपाल कामीले समान १ विकेट लिएका थिए ।