चीनसँगको मैत्रीपूर्ण फुटबलमा नेपाल विजयी

२८ माघ, हेटौंडा । नेपाल र चीनबिच शनिवार भएको मैत्रीपूर्ण फुटबल खेलमा नेपाल विजयी भएको छ । चिनियाँ नयाँ वर्षको उपलक्ष्यमा दशरथ रङ्गशालामा शनिबार भएको खेलमा नेपाली यू–२३ टोलीले चिनियाँ टोलीलाई ५–१ गोलले हरायो ।
नेपालको जितमा समिर तामाङले दुई गोल गरे । यस्तै छिरिङ लामा, सञ्जिव विष्ट र निराजन धामीले एक एक गोल थपे । चिनियाँ टोली चिङ्घाइ फुटबल क्लबका लागि जासी पेङ्कोउले सान्त्वना गोल फर्काए । नेपालका सञ्जिवले खेल सुरु दोस्रो मिनेटमै  हड गोल गर्दै नेपाललाई अग्रता दिलाएका थिए ।
मैत्री खेलको राष्ट्रिय सभाका अध्यक्ष गणेश तिमिल्सीना, नेपालका लागि चिनियाँ राजदूत चेन सङ, युवा तथा खेलकुद मन्त्री डिगबहादुर लिम्बुले रेफ्रीलाई बल हस्तान्तरण गरि उद्घाटन गरेका थिए । उद्घाटन अघि सम्बोधन गर्दै अध्यक्ष तिमिल्सीनाले खेलकुदको माध्यामबाट दुई देशबिचको मित्रताले थप उचाई लिएको बताए ।
चिनियाँ राजदूत चेन सङले नेपाल चीन मित्रता सँधै अमर रहने बताए । मैत्रीपूर्ण खेलसँगै रंगशालामा नेपाल र चिनियाँ विभिन्न सांगितीक प्रस्तुती दिएका थिए । चिनियाँ नयाँ वर्षको उपलक्ष्यमा नेपालस्थित चिनियाँ राजदूतावास, राष्ट्रिय खेलकुद परिषद् (राखेप) र नेपाल पर्यटन बोर्डले संयुक्त रूपमा मैत्रीपूर्ण फुटबल खेल आयोजना गरेको हो ।