हेटौँडा नगरमा १३ प्रतिशत विद्यार्थीले परिक्षा दिदैनन

२८ पुस, हेटौँडा । हेटौडा उपमहानगरपालिकाको नगरस्तरीय आधारभुत तहका विद्यालयका १३ प्रतिशत विद्यार्थीले परिक्षा नदिने तथ्याङक सार्वजनिक भएको छ  । शुक्रबार नगर स्तरीय शैक्षिक समन्वय समितिको आयोजनामा जिल्ला शिक्षा कार्यालय मकवानपुरको सभाहलमा भएको  “हेटौंडा उपमहानगरपालिका भित्रका आधारभूत तहका सामुदायिक विद्याललयको स्तर सुधारमा हाम्रो भुमिका“ विषयक अन्तरक्रिया   कार्यक्रममा स्रोत व्यक्ती केशव सञ्जेलले तथ्याङक कार्यपत्रमा प्रस्तुत गर्दै  आधारभुत तहका विद्यालयका १३ प्रतिशत विद्यार्थीले परिक्षा नदिने गरेको जानकारी दिए ।

त्यसैगरी काठमांडौ विश्वविद्यालयका प्रध्यापक डा. वासुदेव सुवेदीले प्रधानाध्यापकहरु माझ विद्यालयको सुरक्षा शिक्षण सिकाई, अन्तर व्यक्ति सम्बन्ध, सहभागितात्मक तथा स्रोतपूर्ण विद्यालय वातावरण, नेतृत्व तथा व्यावसायिक सम्बन्धको विषयका चर्चा परिचर्चा गरेका थिए । उनले  शिक्षकहरुलाई सिकाईमुलक शिक्षामा लाग्न आग्रह समेत गरेका छन । त्यस्तै, परिक्षा नियन्त्रण कार्यालय भक्तपुरका उप निर्देशक डा. तोयानाथ खनालले विद्यालयको स्तर सुधारका लागि शैक्षणिक नेतृत्व हुनुपर्ने बताए । विद्यालयको स्तर सुधार गर्न विभिन्न प्रयासहरु मध्ये सकारात्मक चिन्तन, प्रतिवद्धता, प्रयास को थालनी गर्न सकियो भने सुधार हुने  खनाले बताए ।

मध्यमाञ्चल क्षेत्रीय शिक्षा निर्देशनालय हेटौडाका उप निर्देशक बद्री बहादुर पाठकले नगर स्तरका विद्यालयको सुधारका लागि पहिला शिक्षकहरु नै लाग्नु पर्नेमा जोड दिए । नगरस्तरिय शैक्षिक समन्वय समितिका अध्यक्ष गणेश प्रसाद हुमागाईको सभाध्यक्षतामा  भएको कार्यक्रममा  हेटौडा उपमहानगरपालिकाका मेयर हरि बहादुर महत, उप मेयर मिना लामा, जिल्ला शिक्षा कार्यालयका प्रमुख बद्रीनारायण भट्टराई, नगरका सामुदायिक विद्यालयका प्रधानाध्यपकहरु, नगरका वडा अध्यक्षहरु, शिक्षकहरुको संघ संगठनहरुका प्रतिनिधि लगायतको उपस्थिति रहेको थियो ।  हाल हेटौँडा नगरमा प्रावि, निमावि र मावि तहका १६४ विद्यालय रहको छ ।