स्ट्यानको आयोजनामा जिल्लास्तरीय हाजिरी जवाफ सम्पन्न

२० फागुन, हेटौंडा । विज्ञान शिक्षक समाज (क्त्ब्ल्) मकवानपुरको आयोजना र मकवानपुर बाल विद्या सदनको सहकार्यमा शनिवार जिल्लास्तरीय विज्ञान हाजिरी जवाफ प्रतियोगिता सम्पन्न भएको छ । 
हेटौँडा–१८ स्थित मकवानपुर बाल विद्या सदनको सभाहलमा भएको सम्पन्न प्रतियोगितामा जनप्रिय मावि हेटौँड–१६ प्रथम, तुलसीमेहर मावि हेटौँ–१० द्धितीय र नवोदय शिशु सदन हेटौँडा–४ तृतीय भएका छन् । विजयी विद्यायलहरुले क्रमशः नगद ५ हजार, ४ हजार, ३ हजार रुपौयाँसहित प्रमाणपत्र प्राप्त गरेका छन् ।
स्ट्यान जिल्ला अध्यक्ष खेमराज लामिछानेको सभाध्यक्षतामा भएको कार्यक्रममा राष्ट्रिय परीक्षा बोर्ड मकवानपुरका प्रमुख कृष्णप्रसाद घिमिरेको प्रमुख आतिथ्यता तथा बाल विद्या सदनका निर्देशक सुदीप गिरीको विशिष्ट आतिथ्यता रहेको थियो । 
कार्यक्रममा प्रमुख अतिथि घिमिरेले विज्ञान र प्रविधिको विकासले देशको विकासमा टेवा पुग्दन बताउँदै यस्ता कार्यक्रमहरूले विद्यार्थीहरूमा विज्ञान प्रतिको सकारात्मक धारणा अभिवृद्धि हुन सहयोग पुग्ने विश्वास व्यक्त गरे । यस्तै कार्यक्रममा विशिष्ट अतिथि गिरीले नवप्रवर्तनात्मक क्षेत्रमा काम गर्नेहरू सँग आफू सहकार्य गर्न सधैँँ तयार रहेको बताए ।
जिल्लाका १८ ओटा विद्यालयहरूको सहभागिता रहेको कार्यक्रममा पहिलो छनौट चरणबाट ९ ओटा विद्यालयहरूबिच प्रतिस्पर्धा गराईएको थियो । प्रतियोगितामा माध्यमिक तह विज्ञान विषयका असी प्रतिशत र सामान्यज्ञानका बीस प्रतिशत प्रश्नहरू समावेश गरी हाजिरी जवाफ प्रतियोगिता सञ्चालन गरिएको स्ट्यानका जिल्ला सचिव सुवास खनालले जानकारी दिए ।
जिल्ला सचिव सुवास खनालले सहजिकरण एवं उपाध्यक्ष भरत पोख्रेलले स्वागत गरेको कार्यक्रममा स्ट्यान प्रदेश सदस्य मनिल कर्ण, अग्रज विज्ञान शिक्षक राधेलाल मण्डल, जिल्ला सहकोषाध्यक्ष सुनमाया पाख्रिन, मकवानपुर गढी पालिका अध्यक्ष दीपेन्द्र यादव, मनहरि पालिका अध्यक्ष ओम प्रकाश सापकोटा, हेटौँडा नगर सचिव सुदर्शन पौडेल, नगर सदस्य ईश्वर रिजाल शिक्षकहरू अर्चना दहाल, रविन श्रेष्ठ लगायतको आतिथ्यता रहेको थियो ।