बागमती प्रदेशमा कांग्रेसका मन्त्रीले आजै राजीनामा दिने

२२ फागुन, हेटौंडा । केन्द्रमा सत्ता समिकरण परिवर्तन भएसँगै बामगती प्रदेश सरकारमा रहेका कांग्रेसका मन्त्रीहरुले राजिनामा दिने भएका छन् । कांग्रेसका तर्फबाट मन्त्री रहेका ६ जना मन्त्रीहरुले आज नै राजिनामा दिने भएका हुन् ।

कांग्रेस बागमती प्रदेश संसदीय दलका उपनेता रामकृष्ण चित्रकारले आजै मुख्यमन्त्री शालिकराम जम्कट्टेललाई भेटेर राजिनामा बुझाउने जानकारी दिए।प्रदेशको उद्योग वाणिज्य भुमि तथा प्रशासन मन्त्री समेत रहेका उपनेता चित्रकारले सरकारबाट बाहिरिएसँगै सरकारलाई दिनएको समर्थन पनि फिर्ता लिने बताए । उनले सरकारलाई दिएको समर्थन फिर्ता लिएर कांग्रेसको नेतृत्वमा सरकार बनाउन पहल गर्ने पनि बताए ।

मन्त्री चित्रकारका अनुसार युरोप भ्रमणमा रहेका दलका नेता एवं आर्थिक मामिला मन्त्री बाहादुर सिंह लामा सँगै रहेका खानेपानी मन्त्री तिर्थ लामा र राजधानी हेटौँडा बाहिर रहेका अन्य मन्त्रीहरु हेटौँडा फर्कदै छन् । उनले आफुपनि हेटौँडा आउने तयारीमा रहेको जानकारी दिए ।

यता बदलिएको राजानितिक अवस्थाको विषयमा केन्द्रीय नेतृत्वसँग छलफल गर्न प्रदेशका मुख्यमन्त्री शालिकराम जम्कट्टेल पनि काठमाडौं पुगेका थिए । उनी पनि आहिले हेटौँडा फर्किदै गरेको बुझिएको छ । 

बागमती प्रदेश सरकारमा कांग्रेसका ६ जना मन्त्री रहेका छन् । कांग्रेस बागमती प्रदेशका संदीय दलका नेता एवं आर्थिक मामिला तथा योजना मन्त्री बाहादुर सिंह लामाको नेतृत्वमा कांग्रेसका रामकृष्ण चित्रकार उद्योग वाणिज्य भुमि तथा प्रशासन मन्त्री, तिर्थ लामा खानेपानी, उर्जा तथा सिँचाई, उत्तम जोशी स्वास्थ्य, मसिना खड्का वन तथा वातावरण र पुकर महर्जन संस्कृति पर्यटन तथा सहकारी मन्त्री रहेका छन् ।