भैरव अर्याल स्मृति सम्मान लामिछानेलाई प्रदान

२६ फागुन, हेटौंडा । हाँस्य व्यङ्ग्यकार भैरव अर्यालको स्मृतिमा स्थापित भैरव अर्याल स्मृति सम्मान २०८० बाट यसवर्ष हाँस्य व्यङ्ग्यकार मीनप्रसाद लामिछाने सम्मानित भएका छन् ।
साहित्यको हाँस्य व्यङ्ग्य क्षेत्रमा योगदान पु¥याएको भन्दै मकवानपुरका लामिछानेलाई शुक्रबार सम्मान गरिएको हो । कार्यक्रमका प्रमुख अतिथि प्रा.डा. मुकेशकुमार चालिसेले उनलाई सम्मान पत्रसहित नगद २१ हजार १ सय ११ रुपैयाँ प्रदान गरेका थिए । लामिछानेको ‘मैले जिउन जानिनँ’ हाँस्य व्यङ्ग्य कविता संग्रह प्रकाशित छ । 
यसअघि यो सम्मानबाट सञ्जय साह मित्र, हरिकला उप्रेती, राजकुमार लामिछाने, धुर्मस सुन्तली फाउण्डेशन, मनोज गजुरेल, चट्याङ मास्टरलगायत सम्मानित भइसकेका छन् । 
साहित्य सङ्गम मकवानपुरका अध्यक्ष डीबी बर्तौलाको अध्यक्षतामा भएको कार्यक्रममा कृष्ण मुरारी गौतम (चटयाङ मास्टर) ले काठमाडौंलाई राजनीतिको शहर बनाउनुपर्ने र हेटौंडालाई हास्य व्यङ्ग्य शहर बनाउनु पर्ने बताएका थिए । उनले हास्यव्यङ्ग्य राधा कविता वाचन गरेका थिए ।
कार्यक्रममा सर्जक सञ्जाल मकवानपुरका अध्यक्ष निमेष निखिल, सिस्नुपानी नेपाल मकवानपुरका अध्यक्ष राजकुमार लामिछाने, हास्य व्यङ्ग्यकार आरसी रिजाल, पुरस्कार संस्थापक दीपक अर्याललगायतको आतिथ्यता रहेको थियो ।