हेटौंडामा अवैध नेपाली र भारतीय नोट सहित ४ पक्राउ

फोटो:जिप्रका मकवानपुर

२७ फागुन, हेटौंडा। मकवानपुरको हेटौंडाबाट भारतीय र नेपाली करिब आठ लाख रुपैयाँसहित चारजना पक्राउ परेका छन्।

आइतबार बिहान जिल्ला प्रहरी कार्यालय मकवानपुरको टोलीले  पूर्व–पश्चिम राजमार्गअन्तर्गत हेटौँडा उपमहानगरपालिका– १५  रातोमाटेमा वीरगन्जबाट नारायणघाटतर्फ जाँदै गरेको बिआर ०१ एआर २९९१ क भारतीय कार रोकेर जाँच गर्ने क्रममा भारतीय रुपैयाँ पाँच सयको नोट एक हजार ४२ थानको पाँच लाख २१ हजार, दुई सयको नोट ९३ थानको भारु १८ हजार ६ सय, सयको नोट ९३ थान भारु नौ हजार तीन सय, ५० को नोट चार थान भारु दुई सय गरी जम्मा भारु पाँच लाख ४९ हजार एक सय रुपैयाँ सहित ४ जनालाई पक्राउ गरेको हो। 

उक्त स्रोत नखुलेको अवैध नोट सहित  कारचालक भारतको बिहार राज्य सीतामणि थाना– ९ भुभैरवो बस्ने वर्ष ३० का राकेशकुमार र सोही कारमा सवार सोही स्थानका वर्ष ३० का चन्द्रबाबु, वर्ष ३७ का अशोक राय र सुनसरी जिल्ला कोशी गाउँपालिका बस्ने वर्ष ३२ का निजाम मियाँ रहेको मकवानपुर प्रहरी प्रवक्ता प्रहरी नायब उपरीक्षक लक्ष्मी भण्डारीले जानकारी दिएका छन् । उक्त रकम कारको सिटमुनि लुकाई ल्याएको  अवस्थामा बरामद गरिएको प्रहरी नायब उपरीक्षक  भण्डारीले जनाएका छन्। पक्राउ परेका माथी आवश्यक अनुसन्धान भइरहेको जनाइएको छ ।