सोमबारदेखि कुष्माण्डमा मकर मेला

३० पुस, हेटौँडा । रत्ना, कर्णा र कौशबाहीको संगम स्थल हेटौंडाको कुष्माण्ड सरोवर त्रिवेणी धाममा सोमबारदेखि मकर मेला लाग्ने भएको छ । माघ १ गते माघे संक्रान्तिदेखि एक महिने मकर मेला लाग्ने भएको हो । मेलामा यो बर्ष वाचन शिरोमणी बेदान्तचार्य सुभद्रा नेपाललगायत बिभिन्न गुरुहरुले कथा वाचन गर्ने भएका छन् ।
माता  कुष्माण्ड भगवतीले तपस्या गरी सिद्धि प्राप्त भएको सिद्ध क्षेत्र, पाण्डबहरुले श्राद्ध तर्पण गरेको, अम्बरीष राजाले भगवान बिष्णुको आज्ञाले १०८ धारामा स्नान गरी सन्तान लाभ भएको लगायत बिभिन्न रोगहरु निदान भएको धर्म शास्त्रमा उल्लेख भएअनुसार यस क्षेत्रको महत्व रहेको कुष्माण्ड सरोबर त्रिवेणी धाम बिकास समितिका अध्यक्ष ईश्वरी न्यौपानेले जानकारी दिए । तिनवटा नदिहरुको संगमस्थलका साथै उत्तरबाहिनी नदिका कारणपनि यस क्षेत्रमा आएर गरीने स्नान पनि बिशेष रहेको छ ।
समितीका अध्यक्ष ईश्वरीप्रसाद न्यौपानेको संयोजकत्वमा ५ सय १ सदस्यीय मेला मूल आयोजक कमिटी गठन गरी यस अघि नै तयारीलाई तिब्रता दिइएको थियो । मेलालाई व्यवस्थित बनाउन कार्यसमितीका सदस्यहरुको संयोजकत्वमा १३ वटा उपकमिटी समेत सक्रिय भइरहेको छ । प्रचारप्रसार उपसमितीको संयोजकमा तारा लामिछाने, सजावट समितीमा सुरज कुईकेल, बिद्युत÷माईक व्यवस्थापन उपसमितीमा शिवप्रसाद धिमाल, भान्छा तथा भण्डारण व्यवस्थापनमा कृष्ण नेपाल, अतिथी सत्कार व्यवस्थापनमा तिलकप्रसाद दुलाल, पुजा ब्यवस्थापनमा ज्ञानु कुवंर, भजनकिर्ततनमा रामप्रसाद सुवेदी, प्रसाद वितरण व्यवस्थापनमा रुपा लुईटेल, संहिदा र स्वयंसेवक व्यवस्थापनमा कमल सापकोटा, सरसफाईमा हरि गौतम र सामान खरिदमा रामजी दाहालसहितको समितिको तयारी सकिएको समितिले जनाएको छ । 
मेला सम्पन्न गर्न करीब ५ लाख खर्च हुने समितिले अनुमान गरेको छ । एक महिने मकर मेलामा यस बर्ष अग्नीमहापुराण कथा प्रबचन हुनेछ । कार्यक्रम अनुसार माघ २९ गते बटुकहरुको सामुहिक ब्रतबन्ध पनि रहेको छ । त्यसैगरी प्रत्येक दिन बिहान पाठपारायण नित्य पुजा तथा कथा प्रबचन हुनेछ भने माघ २ गते औशीको दिन गंगा आरती, २८ गते लक्षवर्ती प्रज्ज्वलन, २९ गते तिलार्चन प्रसादी बितरणको कार्यक्रम रहेको अध्यक्ष न्यौपानेले जानकारी दिए ।  यसैगरी यसबर्षबाट कुष्माण्ड भगवतीको दर्शन गर्न कुष्माण्ड सरोबरमा डुंगाको समेत ब्यबस्था गरीएको अध्यक्ष न्यौपानेल बताए ।