भुटनदेवी माविको नेतृत्वमा वडाध्यक्ष सिग्देल

६ चैत, हेटौंडा । हेटौंडा उपमहानगरपालिका वडा नम्बर ४ मा रहेको भुटनदेवी माध्यमिक विद्यालय (प्राविधिक शिक्षालय)को व्यवस्थापन समितिको अध्यक्षको जिम्मेवारी ४ नम्बर वडाध्यक्ष नविन सिग्देलले लिएका छन् । 
गत पुस २९ गते अभिभावक भेला भएता पनि धेरै जना आकांक्षी भएपछि विद्यालय व्यवस्थापन समिति चयन हुन सकेको थिएन । त्यसबेला २ जना खुलातर्फको सदस्यको लागि १४ जना र २ जना महिलातर्फका सदस्यको लागि २० जनाको उम्मेदवारी परेपछि अभिभावकबाट विद्यालय व्यवस्थापन समिति सदस्य चयनमा हुन नसकेको हो । 
आवश्यक छलफलपछि सर्वसम्मत रुपमा विद्यालय व्यवस्थापन समितिले नयाँ समिति चयन गरेको हो । विद्यालय व्यवस्थापन समितिको सदस्यहरुमा गोमा सुनुवार, रिमा श्रेष्ठ, कृष्ण प्रसाद कँडेल, नारायण प्रसाद तिमल्सिना, राजेन्द्र बस्ताकोटी र राधिका चौंलागाई रहेका छन् । मंगलबार पत्रकार सम्मेलनमा बोल्दै अध्यक्ष सिग्देलले विद्यालयको समग्र विकासमा आफूले कुनै सम्झौता नगर्ने बताए । 
उनले आगामी दिनमा शिक्षाको गुणस्तर वृद्धि गर्न उदाहरणीय काम गरेर देखाउने प्रतिवद्धता व्यक्त गरेका छन् । साथै विद्यालयका पूर्वप्रधानाध्यापक डेण्टी जंग शाहको स्मृतिमा विद्यालयमा डेण्टी स्मृति कोषको स्थापना गरिनेसमेत अध्यक्ष सिग्देलले घोषणा पनि गरेका छन् ।
सुरुवातमा १० लाख रुपैयाँ रकम कोषमा जम्मा गरिने र पछि रकम विस्तार गरीदै लगिने अध्यक्ष सिग्देलले बताए । कोषबाट विद्यालयका गरीब जेहेनदार विद्यार्थीलाई छात्रवृत्ति प्रदान गरिने उनको योजना छ ।