कैलाश अध्यक्ष कप फुटबल प्रतियोगिता सुरु

८ चैत, कैलाश । मकवानपुरको कैलाश गाउँपालिकामा बुधबारबाट सुरु भएको दोस्रो संस्करणको अध्यक्ष कप फुटबल प्रतियोगितामा साविक विजेता वडा नम्बर १० ले विजयी सुरुवात गरेको छ । 
कैलाश–९ स्थित नामटारमा सुरु भएको प्रतियोगिताको उद्घाटन खेलमा वडा नम्बर ४ लाई ३–० गोलको फराकिलो अन्तरले पराजित गर्दै वडा नम्बर १० विजयी सुरुवात गरेको हो । १० नम्बर वडाको जितका लागी बुद्ध थिङ र सागर बलले एक–एक गोल गर्दा एक गोल भने आत्मघाती उपहार पाएको हो । 
यस्तै बुधबार नै भएको अर्को खेल भने लगातारको पानीका कारण पहिलो हाफपछि रोकिएको छ । दोस्रो खेलमा वडा नम्बर ५ र ९ बीच खेल भइरहेको थियो । बाँकी समयको खेल बिहिवार बिहान हुने रेफ्री सन्तोष राईले जानकारी दिए । 
प्रतियोगिता अन्तर्गत बिहिबार वडा नम्बर २ र ३ तथा वडा नम्वर ६ र ७ बीच प्रतिस्पर्धा हुने कैलाश खेलकुद विकास समितिका संयोजक मोहन वाईबाले जानकारी दिए । यसअघि बुधबार प्रतियोगिताको गाउँपालिकाका गाउँपालिकाका अध्यक्ष लोक बहादुर मोक्तानले उद्घाटन गरे । उनले प्रतियोगिताको उद्घाटन गर्दै खेलले मानिसको शारिरिक र मानिसिक स्वास्थ्यमा सन्तुलन राख्नुका साथै अनुशासनमा बस्न पनि सिकाउँने बताए । अध्यक्ष मोक्तानले प्रतियोगिताले केवल मनोरञ्जन मात्र दिने नभई गाउँपालिकाबाट खेलाडी उत्पादन गर्न समेत सहज हुने विश्वास व्यक्त गरे ।
कैलाश खेलकुद विकास समितिका संयोजक मोहन वाईबाको सभाध्यक्षतामा भएको प्रतियोगिता उद्घाटन कार्यक्रममा गाउँपालिकाका उपाध्यक्ष बाल कुमार मल्ल, प्रमुख प्रशासकीय अधिकृत विनोद रोक्का र वडाध्यक्षहरुको उपस्थिति रहेको थियो ।