राजदेवीमा सप्ताह महायज्ञ शुरु

१ माघ, हेटौँडा । हेटौडा–१७ राजदेवीमा रहेको राजदेवी माविमा सोमबारदेखि श्रीमदभागवत धान्याञ्चल सप्ताह ज्ञानमहायज्ञ शुरु भएको छ । सप्ताहको मकवानपुर क्षेत्र नं. १ का प्रतिनिधी सभा सदस्य कृष्णप्रसाद दाहालले उदघाटन गरेका थिए । उदघाटन पूर्व कलश यात्रा गरिएको थियो । कलश यात्रा हेटौडा–१८ मा रहेको गुफाथान बाट शुरु भै हटियामा रहेको अंगारेश्वर महादेव मन्दिरको परिक्रमा गरी महायज्ञ स्थलमा पुगेको थियो ।
मुल समारोह समितिका संयोजक रामप्रसाद भट्टको अध्यक्षतामा भएको उदघाटन कार्यक्रममा प्रदेश सभा सांसद प्रेमबहादुर पुलामी,हेटौडा–१७ का वडा अध्यक्ष भैरबबहादर राई,राजदेवी मावि विद्यालय व्यवस्थापन समिति अध्यक्ष दिव्यराज धमला, ज्योति मावि विद्यालय व्यवस्थापन समिति अध्यक्ष हर्क रम्तेल, कमला आधारभूत विद्यालयका प्रधानाध्यापक कुमार अधिकारी, राजदेवी दुग्ध उत्पादक सहकारी संस्था अध्यक्ष रामप्रसाद तिमल्सिना, समाजसेवी कृष्णप्रसाद नेपाल, शिक्षक दीपक देवकोटा लगायतकाले मन्तव्य व्यक्त गरेका थिए ।

२० लाख रुपैंया संकलन गर्ने लक्ष्य राखिएको सप्ताह ज्ञानमहायज्ञमा युवापण्डित सुर्दशन चालिसेले कथावाचन गर्ने विद्यालयका प्रधानाध्यापक सानुकाजी पाण्डेले बताए ।