फिफा विश्वकप छनोटः नेपाल पराजित

१४ चैत, हेटौंडा । फिफा विश्वकप छनोटअन्तर्गत बहराइनविरुद्धको दोस्रो खेलमा नेपाल पराजित भएको छ । रफास्थित राष्ट्रिय रंगशालमा मंगलबार राति सम्पन्न खेलमा नेपाल घरेलु टोली बहराइनसँग ३–० गोलअन्तरले पराजित भएको हो । 
घरेलु टोली बहराइनको जितमा सायद बाकेर, अब्दुल्ला युसुफ र कमिल अल–अस्वादले समान १÷१ गोल गरे । खेलको सातौँ मिनेटमै बहराइनले अग्रता लिएको थियो । यस्तै १८औँ मिनेटमा युसुफले पेनाल्टीमार्फत गोल गर्दै बहराइनलाई २–० को अग्रता दिलाए । गोलरक्षक किरणले काउन्टर अट्याकमा बल रोक्ने क्रममा मोहमद मारहुनलाई फल गरेपछि बहराइनले पेनाल्टी पाएको थियो ।
३६औँ मिनेटमा कमिलले गोल गर्दै बहराइनलाई पहिलो हाफमै ३–० को आरामदायी अग्रता दिलाए । उनले वान भर्सेस वानको अवस्थामा गोल गरेका थिए । ७३औँ मिनेटमा नेपालले गोल गरे पनि उक्त गोलले मान्यता पाएन । सनिश श्रेष्ठको क्रसमा सञ्जीव विष्टले बक्सबाट वान टच गोल गरेका थिए तर, साहयक रेफ्रीले अफसाइड दिएपछि नेपालको गोलले मान्यता पाएन ।
समूह ’एच’ मा रहेको नेपाल ४ खेलमा अंकविहीन रहँदै पुछारमा छ । नेपालले आफ्नो पहिलो खेलमा यूएईसँग ४–०, यमनसँग २–० र बहराइनसँग पहिलो खेलमा ५–० गोल अन्तरले पराजित भएको थियो । यसै समूहमा युएई १२ अंकसहित शीर्ष स्थानमा छ । 
९ अंकसहित बहराइन दोस्रो र ३ अंक जोडेको यमन तेस्रोमा छ । यसै समूहको अर्को खेलमा यूएईले यमनलाई ३–० ले पराजित गरेको छ । योसँगै यूएईले शतप्रतिशत जित हासिल गरेको छ ।