मनहरीका युवालाई कपाल काट्ने तालिम सुरु

२७ चैत, हेटौंडा । मकवानपुरको मनहरी गाउँपालिकाका युवाहरुलाई कपाल काट्ने तालिम सुरु गरिएको छ । गाउँपालिकाका युवाहरुलाई स्वरोजगार बनाउने उद्देश्यका साथ आयोजित कपाल काट्ने तालिमको सोमबार उद्घाटन गरिएको हो । 
मनहरी गाउँपालिकाका अध्यक्ष रञ्जन कालाखेतीले तालिमको उद्घाटन गरेका हुन् । अध्यक्ष कालाखेतीले युवाहरुलाई स्वरोजगार बनाउँदै आत्मनिर्भर बनाउने उद्देश्यले तालिमको आयोजना गरिएको बताए । सीपको सदुपयोग गरी व्यवसायिक रुपमा अघि बढ्न सहभागीलाई अनुरोध गर्दै उनले गाउँपालिकाले आवश्यक सहयोग गर्न तयार रहेको बताए । 
गाउँपालिका उपाध्यक्ष सीता पुलामी मगरले तालिमको उद्देश्य अनुरुप सीप सिक्दै व्यवहारमा उतार्न अनुरोध गरिन् । आगामी दिनमा थप तालिमको माग भए विशेष प्राथमिकताका साथ योजना तथा वजेट विनियोजन गरिने उनले प्रतिबद्धता व्यक्त गरिन् । 
मनहरी ३ नम्बर वडा अध्यक्ष एम् सामाजिक विकास समितिका संयोजक अनन्तप्रकाश अर्यालको अध्यक्षतामा भएको उद्घाटन कार्यक्रममा १ नम्बर वडा अध्यक्ष शिवप्रसाद खनाल, ८ नम्बर वडा अध्यक्ष नारायण उप्रेती, ९ नम्बर वडा अध्यक्ष राजकुमार श्रेष्ठ, वरिष्ठ लेखा अधिकृत राजेन्द्र भट्टराई लगायतको आतिथ्यता रहेको थियो । 
मनहरी गाउँपालिकाका उद्यम विकास सहजकर्ता सम्झना दंगालका अनुसार सहभागी ४० जनाले ३ सय ८ घण्टे तालिम लिनेछन् । तालिमलाई इम्मानुएल अनसेक्स सैलुनले समन्वय गरेको हो ।