बानियाँले भने–हेटौँडा प्रदेश राजधानी भयो

३ माघ, हेटौँडा । बुधबार बसेको मन्त्री परिषद बैठकले हेटौँडालाई प्रदेशको अस्थायी राजधानी तोकेको छ । प्रधानमन्त्री शेरबहादुर देउवा नेतृत्वको मन्त्रीपरिषद बैठकले दिउसो हेटौँडालाई प्रदेशको अस्थायी राजधानी बनाउने निर्णय गरेको प्रदेश सभा सदस्य ईन्द्रबहादुर बानियाँले बताए । 
मन्त्रीपरिषद बैठक अघि नेपाली कांग्रेस मकवानपुरका सभापति एवं पूर्व गृहराज्यमन्त्री समेत रहेका ईन्द्र्रबहादुर बानियाँले प्र्रधानमन्त्री देउवालाई राजधानी बनाउन दवाव दिएका थिए । ‘पार्टी सभापति समेत रहनु भएका प्र्रधानमन्त्रीसंग मैले हेटौँडालाई राजधानी बनाउनुपर्छ भन्ने अडान लिएँ ।’–बानियाँले भने ‘यसमा राप्रपा अध्यक्ष एवं उपप्र्रधानमन्त्री कमल थापाको समेत समेत सकारात्मक भूमिका रह्यो ।’ 
यसअघि नेकपा एमालेका तर्फबाट भक्तपुरबाट निर्वाचित महेश बस्नेत लगायतका सांसदहरुले भक्तपुरलाई प्रदेश राजधानी तोक्न लविङ गर्दै आएको बताउँदै बानियाँले आफुले हेटौँडालाई नै बनाउन निर्वाचन लगतै प्रधानमन्त्रीलाई यसबारे अवगत गराएको बताए । भौगोलिक अवस्था, पूर्वाधार र क्षेत्रीय स्तरका अधिकांश कार्यालय हेटौँडामा नै रहेको भन्दै उनले यसलाई स्थायी राजधानीको रुपमा कायम गर्न सबैले अहिले देखि नै काम गर्नुपर्नेमा जोड दिए ।