बागमती प्रदेशमा ४६ जना औलोका रोगी

१४ बैशाख, हेटौंडा । बागमती प्रदेशमा हाल ४६ जना औलोको रोगी रहेको जानकारी दिइएको छ । विश्व औलो दिवस २०८१ को अवसरमा बिहीबार हेटौंडामा जनस्वास्थ्य कार्यालय मकवानपुरले आयोजना गरेको पत्रकारसँगको अन्तरक्रियामा ४५ आयातित र एक स्थानीय गरी बागमती प्रदेशमा ४६ जनालाई औलोको संक्रमण रहेको जानकारी दिइएको हो । 
नेपालमा भने औलो रोगबाट संक्रमितको संख्या ४५३ जना रहेको तथ्यांक प्रश्तुत गरिएको छ । विदेशबाट आएकाहरुमा औलो रोगको संक्रमण बढी देखा पर्ने गरेको छ । उच्च पहाडी तथा हिमाली जिल्लामा औलो देखा पर्नु चुनौतीको रुपमा रहेको जिल्ला जनस्वास्थ्य कार्यालय मकवानपुरका प्रमुख कृष्णबहादुर मिजारले जानकारी दिए ।
‘नेपालमा सन् २००८ देखि औलो दिवस मनाउन थालिएको हो । २०१४ देखि २०२५ सम्म औलो निवारण कार्यक्रम सञ्चालन भैरहेको छ’, मिजारले भने, ‘नेपाललाई २०२४ सम्म औलोमुक्त गर्ने लक्ष्य रहेको छ । सोही अनुरुप कार्य भैरहेको छ ।’ लामखुट्टेको टोकाइबाट लाग्ने औलो रोगबाट बच्न सावधानी अपनाउनुपर्ने सर्वसाधारणलाई सुझाव दिइएको छ । 
यसका लागि लामखुट्टेको टोकाइबाट बच्नु नै एकमात्र विकल्प भएको चिकित्सकको सुझाव छ । किटनासक झुल र विषादी माग माग अनुसार वितरण गर्न नसकिएको जनस्वास्थ्य कार्यालय मकवानपुरले जनाएको छ । ज्वरो आइरहनु, दिन बिराएर ज्वरो आइरहनु, टाउको बेस्सरी दुख्नु, बान्ता हुनु र जाडो हुनु औलो रोगको लक्षण भएको स्वास्थ्यकर्मीको भनाई छ । 
नेपालमा सन् १९५८ मा पहिलो पटक औलो रोगको संक्रमण देखिएको थियो । विश्व औलो दिवस विहीबार मकवानपुरसहित देशैभर विविध कार्यक्रमको आयोजना गरी मनाइएको छ ।