आँचलद्वारा विभिन्न विद्याका ९ जना स्रष्टा सम्मानित

१६ बैशाख, हेटौंडा । मकवानपुरका महिला साहित्यकारहरुको अग्रणी संस्था आँचल साहित्य कला पुञ्ज मकवानपुरले शनिवार एक वृहत् साहित्यिक तथा साँस्कृतिक समारोहकाबिच ९ जना स्रष्टाहरुलाई नगद सहित सम्मान गरेको हो ।
आँचलकी अध्यक्ष भावना सापकोटाका अनुसार आँचलले १० हजार नगद राशिको बालकुमारी जगन्नाथ भेटवाल स्मृति साहित्य सम्मान बाट रौतहट जिल्लाकी रेणुका जीसीलाई सम्मान गरिएको जानकारी गराइन् । १० हजार नगद राशिको प्रतिभा धिताल छन्द सम्मान २०८० बाट नुवाकोटकी सुमित्रा सुमी, ७ हजार ५ सय नगद राशिको इश्वर लम्साल स्मृति पत्रकारिता सम्मान पत्रकार सरिता दहाल र ११ हजार १११ नगद राशिको टीकादत्त मायादेवी कुलकुमारी सम्मान काठमाडौंकी प्रभा बराललाई सम्मान गरिएको छ । 
यसैगरी १५ हजार एक रुयैयाँको अप्सरा तिमल्सिना स्मृति साहित्य सम्मानबाट काठमाडौंका नेत्र एटम, ३ हजार ५ सय रुपैयाँ नगद राशिको मंगलादेवी श्रेष्ठ स्मृति बाल प्रतिभा साहित्य सम्मानबाट मकवानपुरकी प्रसिद्धि लामिछाने, ५ हजार रुपैयाँ नगद राशिको मुक्तितारा नवप्रतिभा सम्मानबाट स्वस्तिका बानियाँलाई सम्मान गरिएको छ ।
१० हजार रुपैयाँ नगद राशिकोसुन्तलीमाया श्रेष्ठ युवा प्रतिभा सम्मान २०८० मकवानपुरका साहित्यकार दीपक गौतमलाई प्रदान गरिएको छ भने आँचल साहित्य कला पुञ्जले स्थापना गरेको यसवर्षको आँचल साहित्य सम्मान २०८० बाट हरिवंश भेटवाललाई सम्मान गरिएको छ । 
आँचलकी अध्यक्ष भावना सापकोटाको अध्यक्षता तथा जिल्ला समन्वय समिति मकवानपुरका प्रमुख ललित घलानको प्रमुख आतिथ्यमा भएको कार्यक्रममा सम्मानित साहित्यकारहरुले रचना वाचन गर्नुका साथै समकालीन नेपाली साहित्यमा लैंगिक चेतसम्बन्धी बहसका साथै अन्तरविद्यालयस्तरीय एकल गायन प्रतियोगिता समेत सम्पन्न भएको छ ।