रोयल च्यालेन्जर्स बैंग्लोरुको यसपालिको आईपिएल यात्रा सकियो

फाइल तस्विर

१० जेठ, हेटौंडा । इन्डियन प्रिमियर लिग (आईपिएल) २०२४ मा रोयल च्यालेन्जर्स बैंग्लोरु (आरसिबी)को यात्रा प्लेअफमा पुगेर सकिएको छ ।
बुधबार राति सम्पन्न खेलमा राजस्थान रोयल्ससँग चार विकेटले पराजित भएसँगै आरसिबी प्लेअफबाट बाहिरिएको हो । आरसिबीले दिएको १७३ रनको लक्ष्य राजस्थानले १९ ओभरमा ६ विकेट गुमाएर भेट्टायो ।
राजस्थानका लागि यशस्वी जैसवालले ४५ रन, रियानले ३६ रन, टम कोहलर–क्याडमोर २० र धुव्र जुरेलले ८ रनको योगदान दिए । सञ्जु सैमसनले १७ रन र शिमरोन हेटमायरले २६ रन बनाए ।
आरसीबीका लागि मोहमद सिराजले दुई विकेट लिए भने क्यामरुन ग्रीन, लोकी फर्ग्युसन र कर्ण शर्माले एक/एक विकेट लिए ।
त्यसअघि, टस हारेर ब्याटिङको निम्तो पाएको आरसिबीले निर्धारित २० ओभरमा आठ विकेटको क्षतिमा १७२ रन बनाएको थियो । आरसिबीका लागि विराट कोहलीले ३३ रन, रजत पाटीदारले ३४ रन बनाए भने कप्तान फाफ डु प्लेसिस १७ रनमा आउट हुँदा क्यारुन ग्रिनले २७ रन र महिपाल लोमरले  ३२ रन बनाए । ग्लेन म्यासवेल शुन्य रनमा आउट भए ।
राजस्थानका लागि आवेश खानले तीन विकेट लिए । रविचन्द्र आश्वीनले दुई र सन्दीप शर्मा, ट्रेन्ट बोल्ट र युजवेन्द्र चहलले एक/एक विकेट लिए ।