हेटौंडा - ९ मा पूर्व पश्चिम राजमार्ग अवरुद्ध

२८ जेठ, हेटौंडा । मकवानपुरको हेटौंडा उपमहानगरपालिका वडा नम्बर-९ स्थित पुर्वपश्चिम राजमार्ग अन्तर्गत पशुपति नगरमा स्थानीयले राजमार्ग बन्द गराएका छन् ।

मकवानपुरको मनहरी – ९ रजैयामा भारतीय नम्बर प्लेट भएको ग्यास बुलेट बोक्ने लरीले मोटरसाइकललाई ठक्कर दिँदा मृत्यु भएकी महिलाको परिवारलाई क्षतिपूर्ति दिनुपर्ने माग गर्दै उनिहरुले राजमार्ग बन्द गराएका हुन् ।

गत शुक्रवार एएस– २५ डिसी ०२१२ भारतीय नम्बरको (खाली) ग्यास बुलेट बोक्ने बुलेटको ठक्करबाट ग७प २३०४ नम्बरको मोटरसाइकलमा  पछाडि बसेकी निर्मला अधिकारीको मृत्युु भएको थियो ।

हेटौंडा ८ कमाने घर भइ कामको सिलसिलामा कास्कीको पोखरा उपमहानगरपालिका–११ फूलबारी बस्दै आएकि ३३ वर्षीया अधिकारी चढेको मोटरसाइकललाई हेटौंडाबाट पोखरा फर्किने क्रममा ग्यास बुलेटले  ठक्कर दिएको थियो ।उक्त घटनामा मोटरसाइकल चालक कास्कीको पोखरा– ११ का सुवास गुरुङ घाइते भएका छन् । 

स्थानीयले मृतकको परिवारलाई तत्काल क्षतिपूर्ति दिलाउन माग गरेका छन् । मृतकको परिवारले क्षतिपूर्ति नपाएसम्म शव जिम्मा नलिने स्थानीयले बताएका छन् । राजमार्ग खुलाउने प्रयास जारी रहेको यद्यपि मृतकका आफ्नतले ग्यास बुलेट गाडीलाई रोकेका छन्।