रानी वनद्वारा सांसदलाई सम्मान

१३ माघ, चौघडा । हेटौडा–६ चौघडामा रहेको रानी सामुदायिक वन उपभोक्ता समूहले मकवानपुर जिल्लाबाट प्रतिनिधि सभा र प्रदेश सभाबाट प्रत्यक्ष निर्वाचित सांसदहरुलाई शनिवार सम्मान गरेको छ । 
मकवानपुर जिल्ला निर्वाचन क्षेत्र नं. १ बाट निर्वाचित प्रतिनिधि सभा सदस्य कृष्णप्रसाद दाहाल र निर्वाचन क्षेत्र नम्बर १ (क) का प्रदेश सभा सदस्य प्रेमबहादुर पुलामीलाई सम्मान गरिएको हो । सम्मान पछि आयोजित कार्यक्रममा बोल्दै दाहालले अब देशलाई आर्थिक समृद्धि तर्फ अगाडि बढाउनुपर्ने बताए । ५० लाख युवाहरु विदेशमा रहेकोतर्फ इंगित गर्दै सांसद दाहालले सामुदायिक वनले अव रोजगारीलाई विशेष प्राथमिकता दिनु पर्नेमा जोड दिए । प्रदेश सभा सांसद पुलामीले ३ नं. प्रदेशको राजधानी हेटौडा बनाउन अधिकतम प्रयास गर्ने बताउदै सबैको प्रयासबाट मात्रै समृद्धि सम्भव हुने बताए ।
समूहका अध्यक्ष कृष्णबहादुर विडारीको अध्यक्षतामा भएको सम्मान कार्यक्रममा जिल्ला वन अधिकृत राजेन्द्र न्यौपाने, मकवानपुरगढी–४ का वडा अध्यक्ष भागवत घिमिरे, जिल्ला दुग्ध उत्पादक सहकारी संघ अध्यक्ष बासुदेव अधिकारी, समूहका सदस्य बालकृष्ण चौलागाई, कार्यालय सचिव भीमसेन पौडेल लगायतकाले मन्तव्य व्यक्त गरेका थिए ।