मकवानपुरमा ३५ कुष्ठरोगी

१४ माघ, हेटौँडा । मकवानपुरमा ३५ जना कुष्ठरोगी रहेको आज हेटौंडामा आयोजित एक कार्यक्रममा जानकारी दिईएको छ । ६५ औं विश्व कुष्ठरोग दिवसको अवसरमा आयोजित पत्रकार तथा सरोकारवालाहरुसंग अन्तरक्रियामा स्वास्थ्य कार्यालय मकवानपुरका कुष्ठरोग स्रोतव्यक्ति भुपनारायण यादवले यस्तो जानकारी दिएका हुन् ।

यादवका अनुसार गत आर्थिक बर्षका ३० कुष्ठरोगी उपचाररत रहेको र चालु आर्थिक बर्षको पहिलो चौमासिकमा ५ जना नयाँ विरामी फेला परेका छन् । सबैभन्दा बढि हेटौँडा, मकवानपुरगढी र भीमफेदीमा कुष्ठरोगी फेला परेको जनस्वास्थ्य कार्यालयको तथ्यांकमा छ । यसैगरी, मध्यमाञ्चलमा आव ०७२/०७३ मा १ हजार ३२ कुष्ठरोगी थिए । कुष्ठरोगीमध्ये ४५८ महिला र १२२ बालबालिका रहेको क्षेत्रीय स्वास्थ्य निर्देशनालय हेटौँडाका कुष्ठरोग अधिकृत उत्तम खनालले बताए । उनका अनुसार आव ०७३/०७४ मा १ हजार १ सय ८४ कुष्ठरोगी फेला परेकोमा ४ सय २८ महिला र १ सय १५ बालबालिका रहेका छन् ।

अन्तरक्रिया कार्यक्रममा मध्यमाञ्चल क्षेत्रीय जनस्वास्थ्य अधिकृत विभुकुमार झा, हेटौँडा उपमहानगरपालिकाका प्रवन्धक भीमप्रसाद तिमल्सिना, हेटौँडा अस्तालका प्रमुख डा. कमल दवाडी लगायतले मन्तव्य व्यक्त गरेका थिए । मध्यमाञ्चल क्षेत्रीय स्वास्थ्य निर्देशनालय हेटौंडा र जिल्ला जनस्वास्थ्य कार्यालय मकवानपुरको आयोजनामा भएको कार्यक्रम जिल्ला जनस्वास्थ्य कार्यालयका प्रमुख रामचन्द्र पाठकको अध्यक्षतामा भएको थियो ।

कार्यक्रममा शरिरमा रातो लाटो फुस्रो दाग देखिएमा कुष्ठरोग हुन सक्ने भन्दै स्वास्थ्य संस्थामा जचाउन आग्रह गरिएको थियो । स्वास्थ्यप्रश्वासबाट सर्ने कुष्ठरोगको उपचार निःशुल्क हुने र ६ देखि १२ महिना नियमित औषधी खाएमा निको हुने स्वास्थ्यकर्मीहरुको सुझाव छ ।