हेटौंडामा एक वर्षे प्राथमिक शिक्षकको तालिम कार्यक्रम संचालन हुने

२६ असार, हेटौंडा। हेटौंडामा एक वर्षे प्राथमिक शिक्षक तालिम कार्यक्रम संचालन हुने भएको छ। हेटौँडामा–४ कमलडाँडामा रहेको नवोदय इनोभेसन सेन्टरले आधारभूत तह (कक्षा ४-७) का लागि एक वर्षे प्राथमिक शिक्षक तालिम कार्यक्रम सञ्चालन गर्ने भएको हो। कार्यक्रम संचालन बारे सेन्टरले बुधवार आयोजित पत्रकार सम्मेलनको आयोजना गरि  जानकारी दिएको हो ।

पत्रकार सम्मेलनमा  एक वर्षीय डिप्लोमा कोर्समा २४ जना प्रशिक्षार्थीलाई समावेश गरिने तालिम प्रमुख नरेन्द्र कुमार नगरकोटीले बताएका छन्। उनले कोर्सको रजिस्ट्रेसन प्रक्रिया पहिले नै सुरु भइसकेको समेत जानकारी दिएका छन्।  कार्यक्रम बालकेन्द्रित शिक्षण पद्धतिमा केन्द्रित रहने र  विद्यालयहरूमा शैक्षिक क्रान्तिको अनुभूति दिलाउने शिक्षकहरू तयार गर्नु रहेको नगरकोटीले बताएका छन्। 

तालिममा  सहभागी हुन कक्षा १२ उत्तीर्ण गरेको हुनुपर्ने र यस तालिमको पाठ्यक्रममा शिक्षा दर्शन, भाषा साहित्य, विज्ञान, सामाजिक अध्ययन, गणित, शारीरिक शिक्षा, संगीत, कला, नृत्य, बाल विकास र सिकाइ उपलब्धि जस्ता विषयहरू समावेश गरिएको पत्रकार सम्मेलनमा जनाइएको छ। प्रत्येक विषयको लागि ३६ देखि ४८ घण्टाको पाठ्यक्रम निर्धारण गरिएको उनले बताए ।पत्रकार सम्मेलनमा कोर्सको मासिक  शुल्क ५ हजार ५ सय ५० रहेको जनाइएको छ।