उदयसिँ पत्रकारिता पुरस्कारबाट अधिकारी पुरस्कृत

१६ माघ, हेटौँडा । पहिलो उदयसिँ पाठक स्मृति पत्रकारिता पुरस्कार पत्रकार गणेश दर्पण अधिकारीलाई प्रदान गरिएको छ ।
नगद ७ हजार २२२ राशीको पत्रकारिता पुरस्कार मङ्गलबार बस्तीपुर जेसीज हाँडीखोलाको सातौँ पदस्थापन तथा पुरस्कार वितरण कार्यक्रमकाबीच पत्रकार अधिकारीलाई प्रदान गरिएको हो ।
बस्तीपुर जेसीजको स्थापनाकालदेखि सन् २०१६ सम्म बोर्ड सल्लाहकार रहेका पाठकको स्मृतिमा उनको परिवारले स्थापना गरेको पुरस्कार पत्रकार महासंघ मकवानपुरका सचिव समेत रहेका अधिकारीलाई प्रदान गरिएको हो ।
ग्रामीण एवम् दूरदराजका समस्या उठानसंगै सामाजिक परिवर्तनमा महत्वपूर्ण भूमिका खेलेको भन्दै उनलाई नगदसहित दोसल्ला ओढाएर सम्मानपत्र प्रदान गरिएको हो । यस्तै पाठककै नामको सोही राशीको सामाजिक सम्मान मानवसेवा आश्रम हेटौंडाका प्रमुख रामजी अधिकारीलाई प्रदान गरिएको छ ।
सम्मानित दुवैलाई कार्यक्रमका प्रमुख अतिथि प्रदेशसभा सदस्य एवम् पूर्व गृहराज्यमन्त्री ईन्द्रबहादुर बानियाँ, उदयसिँ पाठक स्मृति प्रतिष्ठानका संरक्षक सावित्री पाठक, जेसीज अध्यक्ष राममणि बर्तौलालगायतले नगद, दोसल्ला, माला र सम्मानपत्र प्रदान गरेका हुन् ।
बस्तीपुर जेसीजको पदस्थापन तथा पुरस्कार वितरण समारोहमा अब प्रत्येक बर्ष एक जना पत्रकार र एकजना सामाजिक सम्मान प्रदान गर्दै जाने पाठकको परिवारले जानकारी दिएको छ ।