पहिलो बैठकमै दिए बानियाँले ठूला दललाई यस्तो चेतावनी

प्रदेश बैठकबाट बाहिरिंदै प्रदेश सदस्य ईन्द्रबहादुर बानियाँ ।

१८ माघ, हेटौँडा । ३ नम्बर प्रदेशको विहिबार हेटौँडामा सम्पन्न पहिलो बैठकमा नेपाली कांग्रेसको तर्फबाट प्रतिनिधित्व गरेका प्रदेशसभा सदस्य ईन्द्रबहादुर बानियाँले ठूला दललाई चेतावनी दिएका छन् । 
मकवानपुरको विभिन्न पूर्वाधारको बारेमा व्याख्या गर्दै बैज्ञानिक र व्यवहारिक ढंगले प्रदेश अस्थायी राजधानी हेटौँडालाई घोषणा गरेकोमा सरकारलाई धन्यवाद दिएका बानियाँले आप्mनो धारणा राख्ने क्रममा ठूला दललाई चेतावनीयुक्त अभिव्यक्ति दिएका हुन् । बानियाँले सहमति, सहकार्य र एकताको राजनीति अघि बढाउन ठूला दललाई चेतावनी दिएका छन् । उनले नेपाली कांग्रेसले ठूलो दल रहँदा पनि समावेशी र समानुपातिक ढंगले व्यवहार गरेको भन्दै अहिले पनि यसलाई पालना गर्न ठूला दललाई सचेत गराएका हुन् । 
लोकतान्त्रिक व्यवस्थाको सुन्दर पक्ष बहुमतले शासन गर्ने र अल्पमतको आवाज सुन्ने भएकाले यसलाई पालना गर्न पनि उनले ध्यानाकर्षण गराए । विगतमा देशलाई गणतन्त्रमा लैजान भुमिका खेल्ने तत्कालिन प्रधानमन्त्री गिरिजाप्रसाद कोइराला, नयाँ संविधान जारी गर्ने तत्कालिन प्रधानमन्त्री सुशिल कोइराला र संघीयता अभ्यासको पहिलो खुड्किलो तीन चरणको निर्वाचन सम्पन्न गर्ने वर्तमान प्रधानमन्त्री शेरबहादुर देउवाको योगदान प्रदेश सभाले भुल्न नहुने उनको भनाई थियो । 
सहकार्य र एकतालाई अघि बढाउन ठूला दलले ख्याल गर्नुपर्ने भन्दै उनले आफुहरु रचनात्मक ढंगले अघि बढ्ने बताए । ३ नम्बर प्रदेशको नेपाली कांग्रेसको संसदीय दलको नेताको रुपमा हेरिएका बानियाँको पहिलो बैठकको अभिव्यक्तिलाई राजनीतिक बृत्तमा अर्थपूर्ण ढंगबाट हेरिएको छ ।