राजदेवी सप्ताहमा ३३ लाख बचत

२० माघ, चौघडा । हेटौडा–१७ राजदेवीमा रहेको राजदेवी माध्यमिक विद्यालयले संचालन गरेको श्रीमदभागवत धान्याचल सप्ताह ज्ञानमहायज्ञमा ३३ लाख ४२ हजार ८ सय ४१ रुपैयाँ बचत भएको छ । शनिवार विद्यालयमा आयोजित सप्ताहको आय–व्यय विवरण सार्वजनिक तथा सम्मान कार्यक्रमको अवसरमा आर्थिक उपसमितिका संयोजक मधुसुदन न्यौपानेले बचत रकमबारे जानकारी दिएका हुन् । सप्ताहमा ४३ लाख ६२ हजार ९ सय ८७ आम्दानी र १० लाख २० हजार १ सय ४६ खर्च भएको संयोजक न्यौपानेले बताए । विद्यालयको भौतिक एवम शैक्षिक व्यवस्थापनको लागि माघ १ गतेदेखि ८ गते सम्म श्रीमदभागवत धान्याचल सप्ताह ज्ञानमहायज्ञको आयोजना गरिएको थियो । 
कार्यक्रममा सप्ताह ज्ञानमहायज्ञको प्रचारप्रसारमा सहयोग गर्ने संचारकर्मी भीमसेन पौडेल र रुपेश दुलाललाई सम्मान गरिएको थियो । विभिन्न उपसमितिमा रहेर सहयोग गर्ने व्यक्तिहरुलाई समेत सम्मान गरिएको थियो । हेटौडा उपमहानगरपालिका १७ का वडा अध्यक्ष भैरबबहादुर राईको प्रमुख आतिथ्यता एवम श्रीमदभागवत धान्याचल सप्ताह ज्ञानमहायज्ञका संयोजक रामप्रसाद भट्टको अध्यक्षतामा कार्यक्रम भएको थियो । 
कार्यक्रममा राजदेवी मावि विद्यालय व्यवस्थापन समिति अध्यक्ष दिव्यराज धमला, प्रधानाध्यापक सानुकाजी पाण्डे, शिक्षक तारानाथ दाहाल, राजदेवी दुग्ध उत्पादक सहकारी संस्थाका अध्यक्ष रामप्रसाद तिमल्सिना, विद्यालयका संस्थापक कृष्णप्रसाद नेपाल, संचारकर्मी भीमसेन पौडेल, प्रचारप्रसार उपसमिति संयोजक सोविता कार्की, गोविन्द दाहाल लगायतकाले सप्ताहमा संकलन भएको रकम विद्यालयको भौतिक एवम शैक्षिक क्षेत्रको विकासमा खर्च गर्नु पर्नेमा जोड दिएका थिए । २०३२ सालमा स्थापना भएको विद्यालयमा हाल कक्षा १० सम्म पढाई भैरहेको छ ।