अछाम प्रहरीद्वारा नगद सहित ८ जुवाडे पक्राउ

५ भदौं, मंगलसेन। अछाम प्रहरीले जुवाको खालबाट ८ जना जुवाडे पक्राउ गरेको छ ।जिल्लाको कमलबजार नगरपालिका वडा नम्बर २ मा हारजित हुनेगरी जुवा खेलिरहेको अवस्थामा ८ जना जुवाडेलाई नगद सहित पक्राउ गरेको हो  ।

हारजित हुनेगरी जुवा खैलिदै छ भन्ने सूचनाको आधारमा इलाका प्रहरी कार्यालय कमलबजारबाट प्रहरी निरीक्षक हर्क बहादुर चन्दको नेतृत्वमा गएको प्रहरी टोलीले कमलबजार २ का दुर्गा रावतको घरमा जुवा खेलिरहेको अवस्थामा नगद  ५१ हजार ९ सय ७५ रुपैयाँ, २ बुक तास र ८ थान मोबाइल सहित ८ जनालाई  पक्राउ गरिएको अछाम प्रहरी प्रमुख डीएसपी ईश्वरी प्रसाद भण्डारीले बताएका छन् ।

पक्राउ पर्नेमा घरधनी रावतसँगै, मलबजार ४ का ३७ वर्षका खड्क बिष्ट, वर्ष ४५ का मन बहादुर चलाउने,वर्ष ४३ का नरेन्द्र ढकाल, वर्ष २६ का प्रेम नेपाली ,वर्ष ३० का बिमल विक, यस्तै पञ्चदेवल विनायक नगरपालिका वडा ५ का वर्ष २४ का जगत बहादुर शाही,र बाजुराको बुढिगँगा ६ का ४६ वर्षका शेर बहादुर विक रहेको जनाइएको छ । पक्राउ परेका माथि आवश्यक अनुसन्धान भइरहेको जनाइएको छ। डिएसपी भण्डारीले जिल्ला प्रहरी कार्यालयको नेतृत्व समालेपछि अछाम प्रहरीले लागुऔषध नियन्त्रणका साथै जुवातासमा नियन्त्रणमा सक्रियता  बढाएको छ।