बानियाँ संसदीय दलको नेता बन्ने सम्भावना बलियो

२४ माघ, हेटौँडा । नेपाली कांग्रेसको ३ नम्बर प्रदेशको संसदीय दलको नेतामा पूर्व गृहराज्यमन्त्री एवं कांग्रेस मकवानपुर सभापति ईन्द्रबहादुर बानियाँको सम्भावना बलियो देखिएको छ । 
संसदीय दल गठनका लागि मंगलबार बसेको बैठकमा यस्तो सम्भावना देखिएको हो । गृहराज्यमन्त्री, संस्कृति पर्यटन तथा नागरिक उड्डयन राज्यमन्त्री भै सकेको र पार्टी जिल्ला सभापति समेत रहेकाले बानियाँ संसदीय दलको नेता बन्ने बलियो सम्भावना रहेको बैठकमा सहभागी एक नेताले बताए । ‘५ जनाले दावि गर्नुभएको छ ।’–ति नेताले भने । संसदीय दलको नेताका लागि ईन्द्रबहादुर बानियाँ, मिलन श्रेष्ठ, नरोत्तम बैद्य, राजाराम कार्की र राधा घलेले दावि गरेका छन् । बैद्य काठमाण्डौं, श्रेष्ठ चितवन, कार्की धादिङ र घले काठमाण्डौंका हुन् । 
दावि गरेकामध्ये समानुपातिकतर्फबाट प्रदेशसभा सदस्य कार्की पूर्व केन्द्रीय सदस्य हुन् भने बैद्यमात्रै प्रत्यक्ष निर्वाचन हुन् । जिम्मेवारीको हिसावले र प्रत्यक्ष निर्वाचित प्रदेशसभा सदस्य भएकाले बानियाँको सम्भावना बलियो रहेको एक प्रदेशसभा सदस्यको भनाई छ । पार्टी पदाधिकारी बैठकले जिम्मेवारी दिएकी केन्द्रीय सदस्य महालक्ष्मी उपाध्याय, अर्जुननरसिं केसीसहितको मंगलबार बसेको बैठक बुधबार थप छलफल गर्ने गरी टुंगिएको थियो ।