डोरमणीका तीन विकल्प

२४ माघ, हेटौँडा । ३ नम्बर प्रदेशमा एकल बहुमत ल्याएको नेकपा एमालेका नेता डोरमणी पौडेलका सामु अहिले तीन विकल्प छन् ।

ज्येष्ठ प्रदेश सदस्य भएकाले प्रदेशसभाको अध्यक्षता गरिरहेका पौडेललाई सभामुख बन्ने विकल्प खुल्ला छ । तर पौडेल आफु सभामुख भन्दा प्रदेश प्रमुखको दावि प्रस्तुत गरिरहेका छन् । ‘म अहिलेको भुमिकामा भन्दा माथिल्लो भुमिकामा योग्य छु ।’–संचारकर्मीहरुसंग प्रतिक्रियामा उनले भने–‘मेरो कार्यशैली र स्वभाव यहाँहरुलाई थाहा छ, त्यसैले म माथिल्लो भुमिका रहन चाहन्छु ।’ सभामुखमा पशुपति चौलागाई र रामेश्वर फुयालको नाम पनि चर्चामा छ ।

मूख्यमन्त्रीको दावि गरिरहेका नेताहरु राजेन्द्र पाण्डे र अष्टलक्ष्मी शाक्यको विकल्प पौडेल हुन सक्ने चर्चा एमाले वृत्तमा छ । दुई कार्यकाल मेयर भएको अभ्याससंगै स्थानीय तह पुर्नसंरचनामा महत्वपूर्ण भुमिका रहेका पौडेललाई मूख्यमन्त्रीको रुपमा हेर्न चाहनेहरु एमालेभित्रै छन् । तर गुटको राजनीतिमा पाण्डे पौडेल भन्दा बलियो देखिन्छन् । पौडेल र पाण्डे ओली गुटका हुन् ।

पौडेललाई तेस्रो विकल्प पनि खुल्ला छ, मन्त्री बन्ने । यसअघि नै आफुलाई शहरी विकास मन्त्रालयको जिम्मेवारी राम्रोसंग चलाउन सक्ने दावि गरिरहेका पौडेललाई यो मन्त्रालय अनुभावका हिसावले पनि उपयुक्त हुने एमाले नेताहरुको भनाई छ । एमाले बृत्तमा पौडेललाई सभामुखभन्दा मूख्यमन्त्री वा मन्त्री बनाउनुपर्ने माग जोडदार उठेको छ ।