प्राधिकरणका ज्यालादारी कर्मचारीद्वारा आन्दोलनको चेतावनी

२७ भदौ, हेटौँडा । नेपाल विद्युत प्राधिकरणका दैनिक ज्यालादारी कर्मचारीले व्यवस्थापन समक्ष आन्दोलनको चेतावनी दिएका छन् । लामो समयदेखि कार्यरत दैनिक ज्यालादारी कर्मचारीलाई व्यवस्थापनले स्थायी प्रक्रिया अगाडी नवढाए आन्दोलन गर्ने चेतावनी दिएका हुन् । 
दैनिक ज्यालादारी संघर्ष समितिको हेटौंडामा भएको केन्द्रिय बैठकले माग पुरा नभए कार्तिक २ गतेदेखि आन्दोलन थाल्ने निर्णय गरेको छ । असोज महिनाभर संगठन सुदृढिकरण अभियान गर्ने, असोज २ गते क्षेत्रीय र केन्द्रिय कार्यालयमा ज्ञापनपत्र बुझाउने, मंसिर ३ देखि ९ गतेसम्म अधिकारकर्मी, ट्रेड युनियन लगायत सरोकारवालाहरुसँग छलफल गर्ने जनाईएको छ । मंसिर ११ गते देशभरबाट काठमाण्डौंमा जम्मा भएका ज्यालादारी कर्मचारीसहितको खुल्ला प्रशिक्षण गर्ने र मंसिर १३ गतेदेखि निर्णायक आन्दोलन गर्ने केन्द्रिय संघर्ष समितिको सार्वजनिक कार्यतालिकमा उल्लेख छ । 
प्राधिकरणमा कर्मचारी अभाव भई कार्य सम्पादनमा अप्ठ्यारो परिरहँदा पनि लामो समयदेखि कार्यरत ज्यालादारी कर्मचारीलाई स्थायित्व दिन पहल नगरेपछि आन्दोलनको घोषणा गरेको संघर्ष समितिका अध्यक्ष नरेन्द्र यादवले बताए । प्राधिकरणमा क्रियाशिल पाँचवटै ट्रेड युनियनले सहमती जनाएपनि ज्यालादारीलाई व्यवस्थापनका लागि वेवास्ता गरेको समितिको भनाई छ । 
प्राधिकरणमा हाल ४ हजार कर्मचारी दरबन्दी रिक्त रहेको छ भने देभर करिव २५ सय कर्मचारी ज्यालादारीमा कार्यरत रहेको समितिले जनाएको छ ।
तस्विर सौ.–राजु पोखरेल