अछाम प्रहरीले ग्याङ्ग फाइट गर्ने र प्रहरी कुट्ने ११ जना विरुद्ध मुद्धा चलायो

७ कार्तिक,मंगलसेन । जिल्ला प्रहरी कार्यालय अछामले  एकसाताको समयमा जिल्लामा भएका छुट्टाछुट्टै दुई घटनामा संलग्न ११ जनालाई पक्राउ गरी  मुद्धा चलाएको छ ।  केहि दिन अघि अछामको बिनायक बजारमा रहेको प्रहरी चेक पोष्टमा आक्रमण गरी ड्युटिमा रहेका प्रहरी माथि हातपात गरी मोबाइल फुटाउने कार्यमा संलग्न रहेका दुई जनालाई सार्वजनिक शान्ति बिरुद्धको कसुरमा र ज्यान मार्ने उद्योगमा फरार रहेका ९ जना गरी ११ जनालाई मुद्धा चलाइएको हो । 
यसरी मुद्धा चलाइएका २ जना पञ्चदेवल बिनायक नगरपालिकाका हुन् भने ९ जना मंगलसेन नगरपालिकाका रहेको अछाम प्रहरी प्रमुख प्रहरी नायव उपरीक्षक ईश्वरी प्रसाद भण्डारीले बताएका छन् । ड्युटिमा रहेका प्रहरी माथि हातपात गरी मोबाइल फुटाउने कार्यमा संलग्न स्थानिय बिजय भनिने बखत बहादुर शाही र हितेश तिमिल्सिनालाई सार्वजनिक शान्ति बिरुद्धको कसुरमा र आसोज ३० गते जिल्लाको तिमिल्सैन स्थित सैनीगडा मेलामा खुकुरी र फलामको रड प्रयोग गरी बान्नीगढी जयगढ गाउँपालिकाको सुगालीका युवाहरु माथि आक्रमण गर्ने मंगलसेन नगरपालिकाको वडा नम्बर ३ र ४ का नौ जना बिरुद्ध ज्यान मार्ने उद्योग अन्तर्रगत मुद्धा चलाइएको प्रहरी प्रमुख भण्डारीले बताएका छन् । प्रहरीका अनुसार शाही र तिमिल्सिनासंगै अन्य तीन जना मिलेर मदिरा सेवन गरी जथाभावि गालीगलौज गर्दै बिनायकको बिच बजारमा रहेको प्रहरी बिट पल्टाएर  ड्युटीमा रहेका प्रहरी माथि हातपात गरी मोबाइल समेत फुटाएको जनाएको छ । घटना पश्चात फरार रहेका पाँच जना मध्ये शाही र तिमिल्सिना पक्राउ परेपनि अन्य ३ जना फरार रहको जनाइएको छ ।
त्यसैगरी आसोज ३० गते सैनीगडा मेलामा खुकुरी र फलामको रड प्रयोग गरी बान्नीगढी जयगढ गाउँपालिकाको सुगालीका युवाहरु माथि आक्रमण गर्ने र घटनामा प्रत्यक्ष संलग्न ९ जनालाई  पक्राउ गरी जिल्ला अदालत अछामको आदेश अनुसार मुद्धा चलाइएको भण्डारीले बताएका छन् । पक्राउ परेका युवाहरुको आक्रमणबाट सुगालीका बिराज रावल, बिनय रावल र महेन्द्र रावल घाइते भएका थिए । उनीहरुको टाउको, ढाड, घाटी र पिठ्युमा चोट लागको छ भने स्थानीय अस्पतालमा उपचार भइरहेको छ । फरार रहेकहरुको खोजी कार्य भइरहेको प्रहरीले जनाएको छ ।