भरतपुर सत्रकिलोमा बस र हायस ठोक्किदा ५को मृत्यु

२३ कार्तिक, रामनगर। मुग्लिन नारायणगढ सडकखण्ड अन्तर्गत चितवनको भरतपुर महानगरपालिका-२९ सत्रकिलोमा रात्री बस र हायस एक आपसमा ठोक्किँदा पाँच जनाको मृत्यु भएको छ भने अन्य ६ जना घाइते भएका छन्। 

शुक्रबार बिहान मुग्लिनबाट नारायणगढतर्फ जाँदै गरेको बागमती प्रदेश  ०६-००१ज ०२९८ नम्बरको हायस गाडी र विपरीत दिशा तर्फ  जाँदै गरेको बागमती प्रदेश  ०३-००१ ख २८१२ नम्बरको बस ठोक्किँदा पाँच जनाको मृत्यु भएको जिल्ला प्रहरी कार्यालय चितवनका डिएसपी भेषराज रिजालले जानकारी दिएका छन्। 

त्यसैगरी दुर्घटनामा दुवै सवारीका ६ जना घाइते भएका छन्। जसमध्ये दुई जना सामान्य, दुई जना उपचार पछि डिस्चार्ज र एकजना गम्भीर रहेको डिएसपी रिजालले बताएका छन् ।

दुर्घटनामा हायसका चालक अन्दाजी ४० ळवर्षीय पुरूष, उक्त गाडीमा सवार गोरखा आरूघाट गाउँपालिका-१ मान्बु बस्ने ४० वर्षीय राजबहादुर गुरूङ, अन्दाजी ४० वर्षीया महिला, ३२ वर्षीया पुरूष र ३५ वर्ष वर्षीय पुरूषको मृत्यु भएको छ।मृतक चार जनाको सनाखत हुन बाँकी रहेको जनाइएको छ। ३ जनाको उपचारको क्रममा र २ जनाको घटनास्थलमै मृत्यु भएको प्रहरीले जनाएको छ। प्रहरीले बस चालकलाई नियन्त्रणमा लिएको जनाइएको छ। दुर्घटनाका कारण बाटो एकतर्फी संचालनमा ल्याइएको छ।