डोरमणीले भने–‘म काममा विश्वास गर्ने मान्छे’

पदभारपछि हस्ताक्षर गर्दै प्रदेश प्रमुख डोरमणी पौडेल ।

हेटौँडा, २९ माघ । ३ नम्बर प्रदेशका मुख्यमन्त्री डोरमणि पौडेलले आफु काममा विश्वास गर्ने मान्छे भएको बताएका छन् । उनले आफु कुरामा कम र काममा बढि विश्वास गर्ने भएकाले अहिलेको स्थानमा आईपुगेको बताए ।

पदभारग्रहणपछि कर्मचारीहरुलाई निर्देशन दिंदै मूख्यमन्त्री पौडेलले प्रतिवद्ध भएर काम गर्न सके ३ नम्बर प्रदेशलाई उत्कृष्ट बनाउन सकिने विश्वास व्यक्त गरे । उनले समन्वयमा काम गर्न र प्रतिवद्ध भएर काम गर्न कर्मचारीलाई निर्देशन दिए । उनले तराईदेखि हिमालसम्म जोडिएको यो प्रदेशका प्रत्येक जिल्लाको आ–आफ्नै विशेषता रहेको बताउँदै स्रोत र साधनले यो प्रदेश सम्भावनायुक्त रहेको दावि गरे । प्रदेशमा रहेको स्रोत र साधनको पहिचानसहित परिचालन गर्दै समृद्धिको शुरुवात गर्ने उनको प्रतिवद्धता छ । 

कार्यक्रममा ३ नम्बर प्रदेश मूख्यमन्त्री कार्यालयका प्रदेशसभा सदस्यहरु, मूख्यसचिव रेश्मीराज पाण्डे, मकवानपुरका प्रमुख जिल्ला अधिकारी चक्रबहादुर बुढा, प्रदेश सचिवालयका सचिव डा. रोजनाथ पाण्डे, सुरक्षा निकायका प्रमुख, पूर्व सभासद, कर्मचारी लगायतको सहभागिता रहेको थियो ।

यसअघि, ३ नम्बर प्रदेश कार्यालय हेटौँडामा एक समारोहको आयोजना गरी ३ नम्बर प्रदेश प्रमुख अनुराधा कोईरालाले पौडेललाई पद तथा गोपनियताको सपथ ग्रहण गराएका थिए । सपथग्रहण गरे लगतै सहिद स्मारकमा पुगी सहिद स्तम्भमा माल्यार्पण गरे ।