थाहा संचारद्वारा पुस्तक सहयोग

२ फागुन, हेटौँडा । विन्दवासिनी मिडिया प्रालिद्वारा सञ्चालित रेडियो थाहा सञ्चार ९९.६ ले बुधबार मनहरी गाउँपालिकाको रजैयास्थित अग्निहोत्री आश्रमलाई धार्मिक पुस्तक सहयोग गरेको छ । 
रेडियोको दशौं बार्षिकोत्सवको सप्ताहव्यापी कार्यक्रम अन्तर्गत दोस्रो दिन रेडियोका संरक्षक एवं संचालक अजेयराज सुमार्गीले आश्रमका गुरु डा. सिताराम खनाललाई आश्रममै पुगेर पुस्तक हस्तान्तरण गरेका हुन् । पुस्तक वितरण गर्दै रेडियोका संरक्षक सुमार्गीले आगामी दिनमा पनि आश्रमलाई आवश्यक पुस्तक उपलब्ध गराउने प्रतिवद्धता व्यक्त गरेका थिए । रेडियोले शुक्र नीति, शुक्ल एर्जुवेद संहिता, चाणक्य नीति, कौटिल्य अर्थशास्त्र लगायतका पुस्तक आश्रमलाई सहयोग गरेको रेडियोका स्टेशन म्यानेजर मणीराज गौतमले बताए । 
कार्यक्रममा विन्दवासिनी मिडिया प्रालिका अध्यक्ष अस्मिता सुमार्गी, सञ्चालकद्वय अरुणराज सुमार्गी, अंकिता सुमार्गीसहित रेडियोका कर्मचारीहरुको सहभागिता रहेको थियो । ६ वर्ष अघि स्थापना भएको आश्रममा १२ जना विद्यार्थीहरु वैद्धिक पद्धति लगायतको अध्ययन गरिरहेका छन् । 
वार्षिकोत्सव कार्यक्रम अन्तर्गत विहिबार थाहा दर्शनको बारेमा ‘समकालिन राजनीतिक कति जनमुखी’ विषयक अन्तरक्रिया गर्ने, फागुन ४ गते हेटौँडाको बुद्ध चोकमा रक्तदान कार्यक्रम, ५ गते साईकल ¥यालि तथा विश्व साईकल यात्री पुष्कर शाहलाई सम्मान, ६ गते वक्तृत्वकला प्रतियोगिता र अन्तिम दिन फागुन ७ गते कवि गोष्ठी एवं थाहा सम्मान कार्यक्रमसहित वार्षिकोत्सव समापन गरिने म्यानेजर गौतमले जानकारी दिए ।